Uthweswe iziqu owashonelwa indodakazi
UKHUTHAZWE ukushona kwendodakazi yakhe ukuze aqhubeke nezifundo owesifazane ozothweswa iziqu zeMaster’s namuhla e-University of Cape Town (UCT). UNkk Mabuyi Mhlanga oyiProgramme Manager yeGo! Durban kuMasipala weTheku, uzothweswa iziqu emkhakheni we-Engineering in Transport Studies.
NgoSepthembea 1 ngo-2016 uNkk Mhlanga washonelwa indodakazi yakhe uMandisa (11) owashayiswa yimoto phambi kwakhe nomyeni wakhe emgwaqweni uFlorida, eThekwini. UMandisa owayefunda uGrade 5 eGordon Road Primary, wayeyocela imali kunina ayeyikhohliwe eyokukhokhela ukuswenkela iSpring Day. Wayelindwe uyise emotweni ngesikhathi eyolanda imali kunina, washonela endaweni yesigameko. Yize uNkk Mhlanga ethi asisoze sadlula emqondweni wakhe lesi sigameko, uthe unqume ukuqhubeka nezifundo zakhe ukuhlonipha indodakazi yakhe.
“Ngiyazi kuyinto engajwayelekile ngoba omunye kungamthatha isikhathi ukuzila nokukhohlwa isigameko esinje. Ngihlonipha indodakazi yami ngoba bengivele ngixoxa nayo ngendaba yokufunda kwami e-UCT,” echaza.
UNkk Mhlanga ubesevele ebhalisile e-UCT ngoJanuwari ngawo u-2016 futhi nendodakazi yazi ngalokhu. “NgoJanuwari kwakuyinyanga yakhe yokuzalwa, sasixoxa ngalo usuku lwakhe nendaba yokufunda kwami futhi engikhuthaza,” kusho uNkk Mhlanga.
Uthe ngesikhathi eshonelwa ingane kwaba khona ukuzisola ukuthi bekumele enze okuthize ukugwema ingozi. Ukusebenza ophikweni lwezomgwaqo nakho kumenze abone ukuthi kumele enze okuthize ukuqinisekisa ukuphepha, athole nezimpendulo ngokushona kwendodakazi yakhe.
Ocwaningweni lwakhe njengoba ebefunda uNkk Mhlanga uthole ukuthi izingozi zomgwaqo zinomthelela omkhulu ekuseshoneni kwezingane ezineminyaka engaphansi kuka-19. Ucwaninge ngokuphepha emgwaqweni evakashela nothishanhloko bezikole zamabanga aphansi ebheka abangakwenza ukuqinisa ukuphepha kwabafundi emgwaqweni. Utshele Isolezwe ukuthi ngo-Okthoba nonyaka wethule izincomo phambi kwengqungquthela ye-EThekwini Transport Authority (ETA).
Phakathi kwenzincomo zakhe ukuthi kwehliswe izinga lejubane eduze kwezikole. Uphakamise nokuthi kwandiswe izimpawu zomgwaqo, kufakwe nezinciphisa jubane. Engqungutheleni ye-ETA uphakamise nokuthi kube nohlelo lokufundisa izingane ngokuphepha emgwaqweni. Uthe okumjabulisayo ukuthi izikhulu zizithakasele izincomo zakhe, okumanje kulindwe isabelomali sangonyaka ozayo kubonakale ukuthi izinhlelo zokuphepha ziqala nini.