Isexwayiso ngokwenza izikweletu

KUXWAYISWA abantu ukuthi bangenzi izikweletu kulo Disemba ukuze ngonyaka ozayo bangangcolelwa amagama abo.

Isexwayiso sikhishwe yisikhulu senhlangano esiza abantu ngemininingwane yabo yezikweletu iTransUnion, uMnuz Lee Naik, izolo.

UNaik uthe abantu akufanele bakhithize ngokweqile ngenxa yamaholidi kodwa kufanele basebenzise imali ngobuhlakani.

Ube esenika abantu amasu ambalwa ukugwema ukuzifaka ezikweletini:

-Bheka isimo sakho sezikweletu ngaphambi kokuya eholidini.

Uthe kubalulekile ukwazi ukuthi umi kanjani ukuze wenze izinhlelo zonyaka omusha, awufuni ukuvula unyaka ngokuyoqala isikweletu.

-Bheka ukuthi izikweletu onazo zikhokhelwa ngesikhathi yini ngoba lokhu kuzokusiza ukuthi uhlale unegama elihle.

-Qinisekisa ukuthi unemali eyanele yezikweletu ezibamba nyangazonke.

UNaik uthe ngoDisemba abantu baholelwa maphakathi nenyanga okusho ukuthi izikweletu ezibamba sekuzophela inyanga zingaba nebhadi lokuthi zingayifici imali uma ungazenzi izinhlelo. Uma kuwukuthi uholelwa maphakathi noDisemba kufanele wenze izinhlelo zokuthi kubanjwe imali ngaleso sikhathi ukuze ungalingeki uyidle.

-Cela ukunyuselwa imali ongayisebenzisa kwi-credit card

Lokhu kuyasiza ukuthi kubukeke sengathi unesikweletu esincane. Akufanele uyisebenzise budlabha imali uma usucele ukuthi bakunyusele.

-Qinisekisa ukuthi uma kwenzeka okuthile kwi-akhawunti yakho yasebhange uyayithola imiyalezo ekwazisayo.

Lokhu kuzokusiza ukuthi ubone uma kukhona imali ephuma ngaphandle kwemvume yakho ukuze usheshe uxhumane nebhange liwulungise lo mkhuba.

-Ungavuli ama-akhawunti amasha ngoDisemba futhi ungavali lawo onawo ngoba lokhu kuzokwenza abakweletisayo bangakukweleteli.