Kuxwayiswa ngamaqola kwezokuvakasha
AMAQOLA athembisa abantu ukuthi azobalalisa emahhotela aphambili abahambise nasezindaweni ezinhle zokuvakasha, aphume ngezinkani njengoba kuyisikhathi samaholidi.
Lawa maqola kuthiwa enza ama-website amahle afake izithombe ezihehayo, aphinde akhangise nasezinkundleni zokuxhumana. Abezokuvakasha bathi akusikhona konke okubhalwe kulawa makhasi okuyiqiniso.
UMnuz Bongani Tembe okhulumela uMnyango wokuThuthukiswa koMnotho, ezokuVakasha noKongiwa kweMvelo KwaZulu-Natal, uthe ungqongqoshe walo mnyango uMnuz Sihle Zikalala uthe abantu mabenze ucwaningo ngezindawo noma amahhotela abazoya kuwo ngaphambi kokuthi bafake imali.
Uthe lokhu bangakwenza ngokuthi baxhumane namahhovisi alo mnyango babuze ukuthi ngabe amahhotela nezindawo zokuvakasha abafisa ukuya kuzo zibhalisiwe yini ngaphansi kwabo, nokuthi ngabe zikulesi sigaba okuthiwa zikuso yini ngempela.
Usho kanjena uNksz Buyisile Gamede waseXobho, ozinze eVosloorus ngokusebenza uthe balahlekelwe uR120 000 ngemuva kokuwakwa ngumuntu abebezitshela ukuthi unenkampani ehlelela abafisa ukuvakasha uhambo, njengoba bebehlele ukuya eKapa kodwa bagcine bengayanga engasatholakali umuntu abamfakele imali. Ehhotela athi ubabhukele kulo kuthiwa wagcina ebuza ukuthi kuyimalini kodwa akazange ayifake imali .
Uthe lo muntu obethi unenkampani baqale ukumazi nyakenye kanti bake bayisebenzisa nabangani bakhe baya eMpumalanga naseLimpopo konke kwahamba kahle.
“Ngixoxele ozakwethu abangamalungu kamasingcwabisane ngale nkampani, baba nesifiso sokuthi siye eKapa. Siwu15 sesisonke umuntu emunye ubekhokha uR8000, ohlanganisa izindleko zokuhamba, imoto esizoyisebenzisa phambili nezinye izinto esizozenza phambili. Bekumele sihambe ngoNovemba 29, ngoNovemba 26 ngimshayele ucingo umuntu ebengixhumana naye wathi ukadokotela. Ngemuva kwesikhashana ngazama ukumfonela ucingo bese luvaliwe, ngaze ngamthola ngakusasa. Uma sengimthola wathi ubegula izinyanga ezimbili akazi ukuthi kuhlelwe kanjani, uKwaZuluNatal uzofika eGauteng ngakusasa sizokhuluma, kwaba ukumgcina kwami. Ngathi sengithi ngiyafona ucingo alusangeni, ikhasi ebelikuFacebok alisekho ne-website isicishiwe, ngabona lapho ukuthi siqoliwe,” kusho yena.
Uthe akazi ukuthi igama abelisebenzisa yilo ngempela kodwa ubezibiza ngomyeni womunye wabalingisi, abathe uma bemthinta wazihlangula wathi akazi lutho ngaleyo nkampani yize igama nesibongo sifana nesomyeni wakhe asebahlukanisa naye.
UTembe uthe amanye ama-website abukeka sengathi awangempela, wanxusa umphakathi ukuthi okungenani uhambele izindawo ezibhalisiwe emnyangweni ukuze uzokwazi ukufaka isikhalo ngazo, uma kukhona okungahambanga kahle.