Ziningi izihlabani ezisishiyile nonyaka
UKUFA yinto esihlala sizwa ngayo usuku nosuku kodwa noma kunjalo yinto engajwayeleki.
Kulo nyaka emkhakheni wobumnandi kuphinde kwadlula izihlabani zakuleli, ebezisijabulisa ngezinto ezihlukene emikhakheni ezikuyo.
Sithe nje siwuvula unyaka sangcwaba uRobbie Malinga, odlule emhlabeni ngoDisemba 25, ngemuva kokugula isikhathi eside. Ukudlula kukaRobbie, kwashaqa iningi ikakhulu emculweni njengoba kwakukhalwa ngokuthi ithalente lakhe belisadingwa abaningi kuleli.
Kuthe kusenesililo sokushona kukaRobbie, kwaphinde kwagadla ukufa kwathatha inkakha yomlingisi weScandal! uSandy Mokwena, owayedume ngelikaBra Eddie. USandy washonela esibhedlela eGoli, ngemuva kokugula.
Kusabatshazwa lokhu, inkakha emculweni we-jazz, uHugh Masekela washona ngemuva kokugula isikhashana. UHugh, washona ngemuva kokuphathwa umdlavuza wamankwahla.
Ngemuva kwakhe kwaba nesikhulu isililo kushona amaciko amathathu kanye kanye engozini yemoto, e-Eastern Cape, u-Akhumzi Jezile, Siyasanga Kobese noThobani Mseleni.
Laba kwavela ukuthi babeya emakhaya kanti babelandela iveni elalidonsa inqola neyaphuma yashayisa imoto ababehamba ngayo, yagingqika.
U-Akhumzi wayengumethuli wezinhlelo nowagcina esenguphrojusa wohlelo lomculo iLive Amp.
USiyasanga wazakhela udumo ecula eqenjini lokholo iJoyous Celebration.
UThobani wayengumlingisi njengoba wayenendawo ayilingisayo efilimini ethi
Akugcinanga lapho, owayengumlingisi weGenerations, uDavid Phetoe owayelingisa indawo kaPaul Moroka wadlula emhlabeni ngemuva kokugula isikhashana.
Abanye abaphinde basishiya emhlabeni umama wesizwe uWinnie Madikizela-Mandela, Aretha Franklin noMary Makgatho owayengumlingisi nowagqama ohlelweni lwezingane iTakalani Sesami.
Indima kamaskandi ayisalanga ngaphandle njengoba igqemeke engeqiwe ntwala ngomculi uSibongiseni “Mjikijelwa” Inxeba. Ngubane.
UMjikijelwa wagula isikhathi eside, wagcina eshonele esibhedlela eThekwini.
Inkakha ye-jazz, uBrian Thusi, nayo kwathuka iningi idlula emhlabeni ngemuva kokugula iphethwe isifo sezinso.
Umdlalo omusha Imbewu: The Seed nawo ulahlekelwe umlingisi obesathuthuka u-Owethu Gambushe odlule emhlabeni kugingqika imoto.
Unyaka sesiwuvala uthe ukuqinisa emkhakheni we-hip hop njengoba uphuce elakuleli izinsizwa ezimbili ezizakhele igama kulo mkhakha. UPro udlule emhlabeni ngemuva kokugula isikhashana. Ukudlula kukaPro kwathinta abaningi njengoba abaningi bamncoma kakhulu ngokuthuthukisa umculo we-hip hop kuleli.
Kwathi kusenjalo kwavela ezokudlula emhlabeni kukaHHP, owatholwa eshonile endlini yakhe, nokwavela ukuthi uzibulele.
U-HHP, kwavela ukuthi ubenokhwantalala nokwenza ukuthi azame ukuzibulala izikhathi eziningana ngaphambilini.
Inkakha yomculo we-bubble gum u-Ali Katt (60) udlule emhlabeni ngemuva kokugula isikhathi eside.