Kusemnyama ngodaba lwabasiza emabhishi abalwa eyemali
AKWAZIWA mbhantshi kujiya ngodaba lwabasebenzi abasiza abasezingozini emabhishi, ama-lifeguard angaphansi kweDurban Central, abahudula izinyawo njengoba sekuqalile ukugcwala emabhishi.
Yisonto lesithathu leli abasebenzi beqale ukuhudula izinyawo befuna umasipala ubakhokhele imali abathi ubakweleta yona kusukela ngo-2007 kuze kube manje.
Ngeledlule inhloko yamapaki nezokungcebeleka eThekwini, uMnuz Thembinkosi Ngcobo, ihlangane nabasebenzi ngenhloso yokuzwa izikhalo zabo kodwa abasebenzi bathi uthe bangu-25 abasohlwini lwabazokhokhelwa ngenyanga ezayo ekubeni bona bazi ukuthi bangu-36 okumele bakhokhelwe.
Omunye wabasebenzi ongathandanga ukudalulwa uthe: “Sibona sengathi asihlonishwa futhi ngalo mhlangano bekuhloswe ukusihlukanisa. Akukho okubambekayo esingathi kuqhamuke kuwo, asazi ukuthi okuthiwa bazokhokhelwa bazokhokhelwa malini, abangezukukhokhelwa bona bazokhokhelwa nini njengoba kuthiwa umasipala usazoludingida udaba lwabo. Nabazokhokhelwa kungenzeka bakhokhelwe imali engaphansi kwaleyo esiyaziyo. Njengamanje sizwa kuthiwa imali esingase siyinikwe iphakathi kukaR8 000 noR10 000 kodwa eMhlanga bakhokhelwa imali engaphezulu kwaleyo futhi kubo akekho osakweletwa wumasipala. Lapha eDurban Central, lapho kuba nezinkinga zokugwiliza khona kwabantu futhi okunabantu abaningi abamnyama abangama-lifegaurd kukhulunywa into engezwakali,” kusho yena.
UMnuz Msawakhe Mayisela okhulumela uMasipala weTheku, uthe umasipala uzokhokhela wonke ama-lifegaurd okumele akhokhelwe kulandelwa umthetho ochaza ukuthi umsebenzi ngamunye wenzani. Uma kukhona abasele kuzobuye kube nezingxoxo zokulungisa udaba lwabo.
“Umasipala uzokwenza isiqiniseko sokuthi okumele bakhokhelwe bakhokhelwa ngokushesha,” kusho yena.
Umthombo waleli phephandaba uthe abasebenzi bathi umasipala ufuna ukukhokhela abasiza esikebheni ushiye ngaphandle abashayeli kodwa uMayisela uthe akulona iqiniso lokhu, kuzokhokhelwa abashayeli bezikebhe nabo ababasizayo abahlonzwe njengabafanele ukukhokhelwa.
Uqhube wathi ngeke ayidalule kwabezindaba imali ezokhokhelwa abasebenzi abafanele ngoba kuyimfihlo ephakathi komqashi nomsebenzi.