Basenkingeni abesitokofela kuhamba owayesayinile
USENKINGENI owesifazane obesayinela imali yesitokofela nentombi kamfowabo evele yathutha endaweni emuva kokuthi eseshonile. Lo wesifazane esingeke simdalule igama ngenxa yokuthi abantu bezitokovela bayahlaselwa uveze ukuthi wayevule ibhuku nomfowabo osashona nentombi yakhe.
Kuthe uma sekushone umfowabo intombi yathutha, kuyimanje akayazi nokuthi ikuziphi izinkalo.
“Ngiyile ebhange Ithala eliseBridge City lapho besilondoloza khona imali yesitokofela ngafike ngachaza ukuthi umfowethu akasekho futhi bengiphethe nesitifiketi sakhe esineminingwane yokuthi akasekho. Ngachaza ukuthi intombi yakhe esasisayine nayo angiyazi ukuthi ikuziphi izinkalo. Ngize ngaya emaphoyiseni namakhosikazi esidlala nawo isitokofela kodwa eThala bangitshela ukuthi angize nentombi kamfowethu. Angisazi ukuthi ngenze njani ngoba amakhosikazi ayayifuna imali yawo,” kusho lo wesifazane.
Isikhulu esiphezulu sebhange, Ithala uMnuz Danny Zandamela, sithe uma kunezinguquko ezenzekayo ngemininingwane yabasayinela imali yesitokofela kufanele ibhalwe phansi futhi kwaziswe nabasebhange.
Uthe odabeni lowesifazane othinte Isolezwe samukelwa isitifiketi sokushona kukamfowabo wacelwa ukuthi eze nowesifazane osayinile ukuze kuphume imali.
“Ikhasimende (owesifazane) alizange lenze lokhu okwakushiwo ebhange kodwa labuya nencwadi yamaphoyisa eyayingasho ukuthi leli lungu liyaphila noma selashona. Samukela isitifiketi sokushona njengobufakazi bokuthi umuntu akasekho,” kusho uZandamela.
Uthe wumthetho wesitokofela othi imali ayiphumi uma umuntu ehamba yedwa kodwa kufanele eze nababhaliswe phansi noma nobufakazi obuphathekayo bokuthi kungani bengakwazi ukuza ebhange.
“Uma kukhona othuthayo kufanele amalungu esitokofela aye ebhange ayochaza. Kufanele othuthayo aphathe imininingwane enekheli lalapho ehlala khona naloyo omusha osezosayinela imali yesitokofela naye aphathe eyakhe. Izinguquko ezenzekayo kufanele zihambisane nomthethosisekelo wesitokofela,” kusho uZandamela.
Ebuzwa ukuthi imali yesitokofela ngeke yini itholwe amalungu asele njengoba kunelungu elishonile?
Uthe wonke amabhange ane-akhawunti yesitokofela adinga kube nabantu abathathu abasayinela imali okuba wuSihlalo, uMgcinamafa noNobhala.
Uma kukhona oshonayo kulaba bantu, uZandamela uthe abasele kufanele beze nesitifiketi sakhe sokushona futhi baqoke nozongena esikhundleni sakhe ukuze amalungu asele aqhubeke nokuthola imali yawo.