Olwamakhaza seludinga ihhovisi likaMengameli
UMNYANGO wezeMpilo KwaZulu-Natal usuze wakhetha ukubabopha abasebenzi bawo abasebenza emakhazeni ahlukene esifundazweni ngoba sekuphele isikhathi esingaphezu kwenyanga singatholakali isisombululo esitelekeni laba basebenzi abasiqala ngenyanga edlule.
Kuqale kwaboshwa abangu-17 basemakhazeni aseFort Napier eMgungundlovu nokuyilapho ukuhudula izinyawo kwabasebenzi kwaqala khona. Laba basebenzi bebephula umyalelo wenkantolo yabasebenzi ngokuqhubeka nesiteleka ngoba bese benikwe izincwadi ezithi ababuyele emsebenzini njengokujwayelekile kuze kube babuyela enkantolo ngoFebhuwari 8.
Bagcine bededelwe ngesexwayiso ngoLwesibili. Kodwa ngalo futhi uLwesibili kuboshwe abasebenzi abangu-13 basemakhazeni akuGale Street eThekwini. Ngokusho kwenyunyana, i-National Public Service Workers Union nabasebenzi baseStanger bathole isexwayiso emaphoyiseni ukuthi nabo bazoboshwa.
Sesiside isikhathi kunomdonsiswano phakathi kwabasebenzi basemakhazeni noMnyango wezeMpilo, esifundazweni futhi abaqali ukuteleka. Ziyazwakala izikhalo zabasebenzi njengoba phakathi kwabakhala ngakho wukungabi nezinsizakusebenza ezifanele nokubeka impilo yabo engcupheni. Umacashelana odlalwa ngumnyango njengoba uthi ezinye izikhalo kumele zilungiswe uMnyango wezeMpilo kuzwelonke awuqondakali ngoba phela abasebenzi baphethwe esifundazweni. Kodwa-ke yize sizwelana nabasebenzi kodwa siyakugxeka ukuthi bonke babonakala bengayicabangeli imindeni eshonelwe nehlukumezekayo uma sekubambezeleka izinhlelo zayo zokungcwaba.
Imindeni yabashonile ayingeni ndawo ezinkingeni abasebenzi abanazo nomqashi wabo futhi kukhombisa ukungabi nalo uzwelo ukujezisa imindeni eshonelwe ngoba nakhu ulwa nomqashi wakho. Isifo siletha izindleko emndenini ngaphezu kobuhlungu osuke umndeni uvele ubhekene nawo wokushonelwa. Ukubambezeleka komngcwabo kwandisa izindleko nokuyinto ehlukumeza umndeni. Ngale nje kwamaphoyisa lolu daba luyadinga ukuthi lungenelelwe nayihhovisi likaMengameli ngoba kuyacaca ukuthi uMnyango wezeMpilo esifundazwe nakuzwelonke behlulekile.