Abasempeshinini bavule isikhungo sokwelapha
NGOKUJWAYELEKILE umsebenzi uma esethathe umhlalaphansi ubuyela ekhaya ayophumula kodwa abahlengikazi baseMlaza, abese besebenze iminyaka ewu-28 esibhedlela eWentworth, bavule isikhungo esifana nomtholampilo esisiza abanezifo ezilawulwa ngemithi ngokubasondezela imithi yabo eduze.
Laba bahlengikazi ngokubambisana namanye amalunga omphakathi basungule inhlangano engenzinzuzo, iNyanda, enesikhungo kwa-J eMlaza.
USister Thembisile Cele oyimenenja yalesi sikhungo uthi baqala inhlangano engenzi nzuzo ngo-2013, ngenhloso yokukhuthaza ukuthi izingane ezifunda ezinkulisa zigonywe, nokukhuthaza abazali ukuthi baziphathise ukudla okunempilo.
Uthe okwakwenza ukuthi bavule le nhlangano ukuthi abanye abazali abasebenzayo bebedlulwa yisikhathi sokugoma izingane zabo, zigcine zingenwa yizifo kungafanele.
“Ezinye izingane zigcina zikhubazekile ngenxa yokuthi zeqe imigomo, uma sezikhubazekile sekudingeka ukuthi zihlinzwe into ebingagwemeka,” kusho yena.
Ngo-2016 uthe baba nesifiso sokusiza umtholampilo wakule ndawo ngokwehlisa olayini abade ngokuthi basondezele labo abalanda imithi yokulawula amahlala khona, okwakuhambisana nesiphakamiso somnyango wezempilo sokuthi kuvele izikhungo eziseduze ezingawusiza ngokusondezela iziguli imithi.
“Iziguli ezilanda amaphilisi bezivuka ngabo5 ekuseni ziyolanda imithi, ezinye zigcine zingafinyelelanga ekhemisi kuthiwe azibuye ngosuku olulandelayo. Ngosuku kuyenzeka ezinye zingabe zisabuyela ngoba zishodelwa imali yokugibela,” kulandisa uSister Cele.
Uqhube wathi yena noSister Doris Dlamini babenombono wokuthi iziguli ngaphambi kokuthi zithathe imithi bazihlole iBP, ushukela, bazikale isisindo, bazeluleke ngokudla okunempilo kanye nokuthi imithi abayilandayo isetshenziswa kanjani.
“Kuzwakala sengathi kungumdlalo ukufundisa umuntu ukuthi amaphilisi aphuzwa kanjani ebe esenesikhathi awaqala, kunabantu ebebesitshela ukuthi amaphilisi aphuzwa kabili ngosuku bawaphuza ngesikhathi esisodwa okwenza ukuthi isifo singalawuleki,” kusho yena.
USister Dlamini uthe: “Abaphathi basemtholampilo bayithanda indlela esifuna ukusebenza ngayo. Inkinga kwaba yizo iziguli ebezingayizwa indaba yalesi sikhungo, bezinovalo lokuthi ngelinye ilanga zizofika kuvaliwe bese zingasazi ukuthi zizoyithola kanjani imithi yazo. Ngokuhamba kwesikhathi baqala ukusithemba manje sineziguli ezilinganiselwa ku-800 ezifika kulo mtholampilo ngenyanga,” kusho uSister Dlamini.
Yize bewenza kahle umsebenzi wabo uSister Dlamini uthi banezinselelo zokuthi abanazo izinsiza ezifana nemibhede enamasondo ngoba kubuye kufike nabanye abantu abagulayo abacabanga ukuthi lesi sikhungo sabo siyefana nomtholampilo.
“Kulo nyaka sihlaselwe yizigebengu zakhuthuza abahlengikazi imali namaselula kwadingeka ukuthi sicele isigungu somphakathi esisebenzisana namaphoyisa ukuthi sibe ngonogada. Amalunga aso ayashintshana ngokugada,” kusho yena.
Okunye okuyinselelo ukuthi indlu abayisebenzisayo ayikho esimeni kodwa basanda kuthola uxhaso lokuthi bayilungise kwa-Eskom.
“Kuyaqala ukuthi sithole uxhaso selokhu saqala ukusebenza, abahlengikazi esisebenza nabo abangamavolontiya abaholi ngisho isenti, emphakathi bayahlekwa kuthiwa badlala izalukazi ezinezimali zazo esezithathe umhlalaphansi bona bamosha imali yabo engekho bazovolontiya,” kusho uSister Cele.