Inkinga yesikhumba imvulele ithuba
IZINKINGA zesikhumba ezingalapheki zimvulele ithuba lebhizinisi owesifazane waseSoweto, obenenkinga yesikhumba eqale ngesikhathi ehlaselwe yisifo sofuba.
UNksz Virginia Gwazube ongumsunguli wemikhiqizo yesikhumba eyaziwa ngePHD Intimate Skincare azisungulele yona ukuze elaphe inkinga yesikhumba esilumayo esinamashanda abomvu, i-sarcoidosis esingene ngesikhathi enesifo sofuba ngo-2014.
Uthe odokotela bamtshela ukuthi abayazi imbangela yalesi sifo futhi okwamanje alikho ikhambi lokuselapha. Bathi imithi ekhona eyokumsiza ukuthi kwehle ukuluma kwesikhumba kodwa amabala ahambisana naso nezinye izinto abakwazi ukukwelapha.
“Angenelisekanga ngesikhathi ngitshelwa lokho esikhungweni sezempilo sikahulumeni. Ngashintsha ngaya kodokotela abazimele ngizitshela ukuthi bazosho okungafani nakhona angilitholanga ikhambi yize bona banginika imijovo kanti ezikhungweni zikahulumeni bengithola umuthi wokugcoba kodwa nayo leyo mijovo yayehlisa ukuluma,” kusho yena.
Uthe inkinga yesikhumba yenze ukuthi noma efisa ukugqoka ibhulukwe ukuze afihle izingxenye zomzimba ebese zinamabala abomvu nokusazilonda ezilumayo angakwazi ngoba lesi sifo asizwani nokushisa. Bekumele agqoke izingubo ezishaya umoya.
“Bese ngisaba nokuhamba phakathi kwabantu ngoba bekungapheli isikhathi eside ngingazinwayanga. Kwafika isikhathi lapho bese ngike ngigcobe ne-spirit ngithi ngizama ukushisa izilonda kwanhlanga zimuka nomoya. Ngabona ukuthi konke engikunikwa odokotela akungisizi ngaqala ngangena kwi-internet ngisizwa udadewethu omncane owumhlengikazi, sifunda ngezithako ezisiza ezinkingeni zezikhumba ezehlukene. Sathatha isinqumo sokuhlanganisa lezi zithako sikhiphe ukhilimu engizowugcoba. Ukhilimu ngamunye bengiwugcoba amasonto amabili uma ngingawuboni umehluko ngishintshe ngenze omunye ngisebenzise ezinye izithako kwengizithole kwi-internet, uma ngibona umehluko ngilungise izikali. NgoJulayi ngibone umehluko ngemuva kokuthi sengizame izithako eziningi ngajabula kakhulu. Ngaleso sikhathi ngangingasenandaba nokuthi yini igama lesithako okwakubalulekile kimi ukubuyelwa ukuthanda umzimba wami engase ngiwunyanya,” kusho yena.
Ngemuva kokuthi ezelaphile uthe wasiza nomunye umngani wakhe obenenkinga yesikhumba esomile naye watshela abanye ukuthi usizwe yini.
“Ibhizinisi liqale kanjalo ngokuthi ngidayisele abanye abantu ukhilimu. Bengingasasebenzi ngoba benginamahloni okuthi ngiyazinwaya kwaba lula ukuthi ngidilivele amakhasimende ami,” kusho yena.
Ngokuhamba kwesikhathi uqale ukukhangisa imikhiqizo yakhe kuFacebook ngokufaka izithombe zakhe ngesikhathi esanenkinga nezakamuva njengoba esegcoba umkhiqizo azakhele wona. Wathola amakhasimende akwezinye izifundazwe.
“Ngifunde ukuthi ayikho inkinga engenaso isisombululo noma ngabe ulwazi olukhona ngaleso sikhathi luthi leso sifo aselapheki. Umkhiziqo wami uqeda ukuluma, amabala, ukuxebuka kwesikhumba okudalwa yilesi sifo futhi angisabi nayo inkinga yokuzwela ukushisa uma ngigqoke into efudumalayo,” kusho yena.