Wakhele abondlekile ezokujima
USENEZIMPAHLA zokujima ezenzelwe nabesifazane abondlekile, osezakhele udumo ngokuba ungoti ofundisa ngezokudla.
UNkk EllaFord Mthethwa ongumsunguli we-Ellagence Wellness Boutique, uthe kumthathe unyaka ukuba nalezi zimpahla ngoba ubefuna zanelise wonke umuntu. UNkk Mthethwa oyiDietician, uthe kwakungekho ezinhlelweni zakhe ukuba nezimpahla zokujima kodwa ngabesifazane abebezifuna. Ngaphandle kokufundisa ngendlela yokudla, waziwa ngokuhambela izindawo enza amaBoot Camp abuye abe yiFitness Trainer.
“Ngenxa yomsebenzi engiwufundele wokuba yiDietician ngabona ukuthi akwanele uma abantu bengawunyakazisi umzimba. Ngithole ukuthi abamnyama basacabanga ukuthi ukudla ngendlela enempilo nokuzivocavoca akuyona into yabo. Abanye bebekhala ngokuthi ukudla okunempilo nokujima kuyabiza, okwenze ngaqala amaBoot Camp ukubakhombisa ukuthi ungazivocavoca noma ikuphi,” echaza. Kulama Boot Camp ufundisa ngokuningi njengoba ethi kukhona abakhuluphaliswa ukuthi badlela ukugqiba izinsizi. “Bekuthi uma nginabesifazane bebona ngigqoke izimpahla zokujima, bathi abazitholi ezabo ezibafanelayo. Abanye bathe abasayi ngisho ejimini ngenxa yokubukwa abantu uma begqoke izimpahla ezingayivezi kahle imizimba yabo. Ngithathe isikhathi ngibheka uhlobo lwezimpahla ezingafanela wonke umuntu, ezizobamba kahle umzimba. Ukufaka izimpahla ezikahle zokujima kubuyisa ukuzethemba kukhuthaze nokuzivocavoca,” kusho yena.
Kulezi zimpahla kukhona amakepisi, ama-tight, amavest, amathawula nezingubo ezakhelwe ukujima. UNkk Mthethwa uthe indlela abazenze ngayo lezi zimpahla ungakwazi ngisho ukuzigqoka uma uzipholele, ungayi ejimini.
Yize ethe uzakhele abesifazane, uthe nabesilisa sebeqalile ukuzifuna. Okwamanje banamakepisi namavesti.
Mayelana namaBoot Camp, uthe uyaqhubeka nawo kuzo zonke izifundazwe. Uphinde abe yingxenye yomcimbi waminyaka yonke iDSTV Mitchell’s Plain Festival, kulo nyaka ebinabantu abangu-40 000. KumaBoot Camp akhe uthe kufika ngisho abanokukhubazeka ngoba nabo kunendlela okumele bazivocavoce ngayo.
I-Ellagence Wellness Boutique wayisungula eminyakeni eyisihlanu edlule, wangena naseziteshini zemisakazo yomphakathi ukukhuluma ngezokudla. Uthe ubebona ukuthi kunamagama namatemu angachazwa kahle ngolimi lwebele uma kukhulunywa ngeDiet.
UNkk Mthethwa uzohlonishwa ngendondo kuma-Influential Women of the Year Awards, eWild Coast Sun ngoDisemba 22. Lo mcimbi uhlelwe yiBig M Productions asebenza nayo njengejaji kuMrs India South Africa. Nguye yedwa omnyama ozohlonishwa kulo mcimbi. Ngesonto eledlule uhlonishwe ngezindondo ezimbili kumaAfrican Hair Awards njengoba eyiNhloko yeMarketing yenkampani yomkhiqizo wezinwele.