Ihlomule ngomsebenzi kwa Afrox inkampani
UGQUGQUZELE izinkampani ezinkulu ukuba zisebenzisane nezincane usomabhizinisi waseThekwini ohlomule ngomsebenzi wokuthumela igesi esetshenziswa ezibhedlela enkampanini enkulu yamagesi i-Afrox.
UMnuz Eugene Skhumbuzo Jamarie wenkampani Isizwe Gas Supplies uthe uyajabula ukuthi uthole umsebenzi wokusabalalisa igesi nezinye izinsiza zokushisela e-Afrox.
Uveze ukuthi uthole lo msebenzi ngenxa yokuthi uhulumeni ugqugquzela izinkampani ezinkulu uma zithole umsebenzi kuye ukuthi zinike izinkampani ezincane u-30% womsebenzi ezisuke ziwutholile.
Uthe akagcinanga ngokuthola umsebenzi kodwa uphinde wahlomula ngamaloli azomsiza uma esethumela igesi.
“Angigcini ngokuthumela igesi ezibhedlela kodwa ngiphinde ngiyithumele emitholampilo yaseThekwini. I-Afrox ingithengele amaloli okuthumela igesi ezibhedlela nekhumbi lokuthwala amagesi engiwathumela emtholampilo. Iloli neloli engilithengeliwe lizoba nomshayeli nomsizi wakhe. Lokhu kuzongisiza ukuthi ngidale amathuba omsebenzi,” kusho uJamarie.
Uthe unabasebenzi abawu18 abaqashe ngokuphelele bese edala amathuba omsebenzi ayisishiyagalolunye.
Ubonge kakhulu uMnuz Mark Radford oyiNhloko yeLPG and Light Industries kwa-Afrox, uMnuz Chris Bezuidenhout oyiMenenja yeCredit and Collection athe uyena onakekela kakhulu osomabhizinisi abancane uma bethenga impahla kwa-Afrox noMnuz Makhula Magoaga obhekelele ezokuthengwa kwempahla kwa-Afrox eNingizimu Afrika yonkana.
Uthe uma ibhizinisi lakhe selikhulile naye uzokwenza njengeAfrox asize abanye osomabhizinisi abasathuthuka ukuze bakhule.
UMnuz Simon Miller obhekelele ezokuxhumana kwa-Afrox uvumile ukuthi banobudlelwano ne-Isizwe Gas Supplies futhi zikhona nezinye izinkampani ezincane abasebenzisana nazo.