Wakha ama-airconditioner adla kangconywana ngakugesi
OWAYEDAYISA inkukhu eyosiwe (chicken dust) usenebhizinisi elakha ama-airconditioner angawumoshi ugesi elibizwa ngeSamac Engineering Solutions.
UMnuz Thabang Mofokeng (40) uthi kwakungelula ngesikhathi ekhetha ukuba wusomabhizinisi.
“Ngesikhathi ngiqala kwakungelula ngoba maningi amabhizinisi engangiwasungula kodwa engaphumeleli. Kukhona isigaba esangifica ngaze ngagcina sengidayisa ichicken dust emarobhothini aseMobeni. Ngafunda okukhulu ngamabhizinisi ami eyengaphumeleli, ngathola imfundo engingayiyelanga esikoleni. Ngiyafisa nabafuna ukungena emabhizinisini bazi ukuthi kuyenzeka usungule ibhizinisi lingaphumeleli kodwa uma ubekezela ligcine selihamba kahle,” kusho uMofokeng.
Uthe iSamac wayiqala ngo-2013 ngenhloso yokuza namasu ebhizinisi elizonakekela imvelo.
Uveze ukuthi ama-airconditioners akhe asebenza kakhulu emicimbini efana nemishado izingqungquthela neminye.
“Sinelungelo lokusabalalisa umkhiqizo obizwa ngePhase Change Material okuwumkhiqizo ozwana kakhulu nemvelo osetshenziswa ukupholisa izakhiwo. Uyasetshenziswa noma kubandiswa iziphuzo ngaphandle kokusebenzisa u-ayisi. Okuhle ngawo wukuthi wonga imvelo nogesi futhi uyinto entsha emakethe,” kusho uMofokeng.
UMofokeng, waseThekwini, usesigabeni sosomabhizinisi abahlanu abadle umhlanganiso emncintiswaneni weSouth African Breweries (SAB) othuthukisa osomabhizinisi.
Njengoba ekulolu hlelo uzothola ukuqeqeshwa ngomakadebona kwezamabhizinisi namanye amakhono azomsiza ukuphumelela.
ISamac ikleliswe esigabeni sokuqala seBroad-Based Black Economic Empowerment.
UMofokeng uthe unabasebenzi abayisishiyagalombili okwamanje kodwa uhlela ukuthi babe wu-53 ngonyaka ozayo. Ngo-2016 iSamac yayiqeqeshwa ezinhlelweni zeDurban Chamber of Commerce and Industry kwathi ngonyaka odlule yangenela umncintiswano obizwa nge-African Youth Energy Innovator.
Ixhaswe yiTechnology Innovation Agency (TIA).
UMofokeng uthe ngaphandle kokuqasha abantu uhlela nokunweba indawo asebenzela kuyo ukuze abe nendawo yokwakha imikhiqizo ehlukene, akwazi ukuyidayisa eNingizimu Afrika yonkana nakwamanye amazwe omhlaba.