UKonqobe ugcine esayinile kuMaZulu
USESAYINILE kuMaZulu FC, u-Ayabulela Konqobe, oqale ukuziqeqesha noSuthu ngenyanga edlule.
Ngokuthola kweSolezwe, uKonqobe usayine inkontileka yezinyanga eziyisithupha, okuzothi uma ziphela, bese egixabezwa ngeminyaka emibili.
Ngokusho komthombo ozazi zonke ezoSuthu, isizathu esenza AmaZulu aqale ngokunika uKonqobe izinyanga eziyisithupha, yingenxa yokuziphatha kwakhe okumbangele iphunga lomzondo emaqenjini aseke wawadlalela.
“Yebo usayinile neqembu izinyanga eziyisithupha (kusuka ngoJanuwari kuze kube kuphela isizini). Kuyothi uma konke kuhambe kahle anikwe iminyaka emibili ngaphezulu. Abaphathi bakhathazekile ngokuziphatha kwakhe, kungakho besafuna ukubona ukuthi uzoziphatha kanjani kulezi zinyanga eziyisithupha. Uma konke kuhambe kahle, uyobe esenikezwa inkontileka yeminyaka emibili nakanjani,” kusho lo mthombo ongafunanga kudalulwe igama lawo.
UKonqobe uke wadlala kwiChippa United, Thanda Royal Zulu ne-Ajax Cape Town, okuyiyona akhulele kuyona. Uke waziqeqesha neKaizer Chiefs ezinyangeni ezimbalwa ezedlule, nokho yagcina ingamsayinanga ngezizathu ezingadalulwanga.
Alingatshazwa ikhono analo uKonqobe kodwa isitha sakhe esikhulu esingamumoshela ikusasa lakhe ukuthanda impilo yasebusuku, ayisheba nokuba ngumrepha.
“Iqembu lifuna umdlali okwazi ukudlala emuva kodwa futhi ongenankinga nokudlala indawo yokumaka esiswini ngoba umqeqeshi uCavin Johnson ukhala ngokungenelwa kweqembu amagoli angenasidingo,” kunezezela lo mthombo.
Ngesikhathi Usuthu lumeme abezindaba ngoMsombuluko, uke waqhamuka umbuzo obubheke kuJohnson mayelana nesimo sikaKonqobe.
“Engingakusho njengamanje ukuthi usaziqeqesha neqembu, asikho isimanga esingako noma okusha engingakusho ngo-Aya (esho uKonqobe),” kusho uJohnson ehleka.
Leli phephandaba lixhumane noBrilliant Mkhathini osehhovisini lezokuxhumana oSuthwini.
“UKonqobe ungumdlali osezingeni eliphezulu kakhulu. Ikhono analo alingatshazwa nhlobo. Usayinile ngoMsombuluko neqembu kodwa akukho okusemthethweni okumenyezelwe yiqembu okwamanje. Kungekudala iqembu lizomemezela ngokusemthethweni,” usho kanje uMkhathini izolo. Ebuzwa ngokuthi kulindeleke ukuthi aqale nini ukudlala uKonqobe, uMkhathini uthe: “Kusele imidlalo emibili (esho ngaphambi kowayizolo neBloemfontein Celtic), ngaphambi kokuthi unyaka uphele. Akukho okujahiwe ngoKonqobe ngakho okwamanje kusenzima uksho ukuthi uyodlala nini”.
nKhonamanjalo wethulwe ngokusemthethweni njengomdlalii omusha weCape Town City uKermit Erasmus owake wayibamba kwi-Orlando Pirates. U-Erasmus ugcine ukudlala ePortugal kwiVitoria de Setubal. Ngaphambi kwalokho uke wazama inhlanhla eFranca nakho kwangalunga.