UNtuli nephupho lesicoco saseMzansi
UPHENDLELWA ebheke empini yesicoco saseMzansi umshayisibhakela waKwaZuuNatal, uSinamiso Ntuli, okubhekwe ukuthi aqhakaze esibhakeleni.
UNtuli ungomunye wabashayisibhakela baseKZN abazakhele igama esigabeni samaamesha kwazise umele iNingizimu Afrika emiqhudelwaneni eyahlukene. Kusukela engene esigabeni esikhokhelayo ukhombisa ukuvuthwa.
UNtuli usahlulwe kanye ezimpini ezine asazilwile. NgoOkthoba, uwine ngamaphuzu kuMarcel Botha oyindodana kasondonzima uFrancois “White Buffalo” Botha. NgoMgqibelo, uNtuli osekleliswe endaweni yesihlanu ezilinganisweni zeBoxing South Africa (BSA), uzobhekana no-Ayanda Mthembu empini yemizuliswano eyisishiyagalombili yesigaba se-middleweight e-Area J Community Hall, eSteadville, eMnambithi.
Le mpi izobe ingeyosuku kwezihlelwe yiStarline Boxing Promotions kaZandile Malinga ezibizwa ngeFuture Champions. Kungenwa mahhala. UMthembu useqhuliwini kwabagaqele ibhande le-SA middleweight elisanda kuhlwithwa nguWalter Dlamini kumpetha uWade Groth ngempelasonto edlule.
UMalinga uthe inhloso yokuqhatha uNtuli noMthembu ukuzama ukumqinisa ukhakhayi.
“Sifuna akhule esibhakeleni. Ulwile noMarcel Botha wathola amava. Siyazi ukuthi u-Ayanda uzomnika impi enzima. Iphupho lakhe wukulwela ibhande laseMzansi, adlulele kwawangaphandle,” kusho uMalinga.
“Emuva kwale mpi sifuna alwele ibhande laseNingizimu Afrika. Sifuna indawo yokuqala ezilinganisweni ephethwe nguAyanda. Kufanele aqine ngoba ukuze afinyelele lapho efuna ukuya khona, kufanele abhekane namabhokisa anzima.”
UMthembu waseMandeni, usehlulwe ezimpini ezintathu zakamuva zilandelana. Ugcine ukungena eringini ngoJuni ekhala ngaphansi ku-Emile Kalekuzi waseDemocratic Republic of Congo (DRC). Usebuya empini yesicoco saseMzansi, se-SA welterweight kodwa wahluleka ukusihlwitha kuSean Ness ngo-2016.
Ngaphandle kwempi kaNtuli noMthembu, kubhekwe ezoba phakathi kukaSthembiso Maduna noSthembile Luzipho wase-Eastern Cape. ULuzipho (1011-0) ukleliswe endaweni yesine yiBSA kwabagaqele ibhande lwe-SA featherweight eliphethwe nguKhanyile Baleni wase-Eastern Cape.
“Kufanele abantu sibakhumbuze ukuthi yithina esihamba phambili esibhakeleni. Sidinga ukufaka amabhokisa ethu ezilinganisweni zeBSA ukuze sandise amathuba okulwela izicoco zakuleli,” kusho uMalinga. Sezizonke izimpi zimi kanje: Middleweight (8 Rounds): Snamiso Ntuli v Ayanda Mthembu
Featherweight (8 Rounds):Sthembiso Maduna v Sthembiso Luzipho
Welterweight (6 Rounds): Sbusiso Malinga v Sheldon Schultz
Lightweight (8 Rounds):Celukuphila Mbonambi v Siphesihle Mntungwa
Bantamweight (4 Rounds):Anele Kunene v Gcina Mpaza
Bantamweight (4 Rounds):Vusi Nyawo v Mthokozisi Mhlongo
Lightweight (4 Rounds Female: Mpume Sibiya v Nothando Ndlovu