Umqeqeshi weMvoti FC awamthusi awe-PSL
UMQEQESHI woMvoti FC, uKabelo Sibiya, uthi alikho nelilodwa iqembu alesabayo kwiPremier Soccer League (PSL) njengoba ezakhe zihlungele ngempumelelo umqhudelwano iNedbank Cup.
UMvoti FC waseGreytown odlala kwi-ABC Motsepe, ubonakala usuyidlulisile eyokudlula emhlabeni komqeqeshi wayo uBheka Phakathi njengoba ungazange ube nencane inkinga udlala imidlalo yokuhlungela iNedbank Cup.
Namuhla azophela amaphupho uma seziqhathwa kulo mqhudelwano, emcimbini ozoqala ngo-7.30 kusihlwa eGoli. USibiya uthe alikho iqembu elimfaka amanzi emadolweni noma kungakhathalekile iKaizer Chiefs, Orlando Pirates noma iMamelodi Sundowns.
“Asikho nesincane isimanga ngamaqembu adlala kwiPSL. Okwethu ukuthi sifuna ukwenza kahle, sihambe ibanga elide kulo mqhudelwano,” kusho uSibiya obecija iBuya Msuthu edlala kwiABC Motsepe League.
“Ngidlalile neBloemfontein Celtic kwiNedbank ngisacija iBuya Msuthu ayizange isixake neze. Sahlulwa amaphutha ethu amabili, esasingawagwema. Ngidlalile futhi neChiefs emidlalweni yesihle, nayo ayizange isixake ngaleyo ndlela. Nginayo indlela yokukwazi ukubhekana namaqembu adlala kwiPremiership, ngakho awangithusi neze,” usho kanje uSibiya.
Njengamanje uMvoti, ukunombolo 8 kwi-log ye-ABC Motsepe kanti uSibiya uthe into ezoshintsha leyo kungekudala.
“Sibheke ukuthi siqhathwa kanjani kusasa (esho namuhla) kwiNedbank Cup. Kuzothi ngemuva kwalokho bese singena emakethe sifuna abadlali ngoba asifuni ukwandisa izibalo kwiNedbank sifuna ukubhincisela nxanye amaqembu. Nesimo esikusona kwi-log asisihle neze, ngakho konke lokho sifuna ukukushintsha. Kungiqinisa idolo ukuthi sinabadlali asebeke badlala kwiNFD esikwatini sethu, nginethemba lokuthi bazolekelela kakhulu abadlali bethu abasebancane ngesipiliyoni,” kusho uSibiya.
Amaqembu akwi-Last 32 yeNedbank
NFD: Cape Umoya United , Jomo Cosmos, Maccabi FC, Mbombela United, RichardsBay FC, Tshakuma FC, TS Galaxy neWitbank Spurs.
KwiSafa ngaphansi kwe-ABC Motsepe:
UMvoti FC, Tornado, Super Eagles, Boyne Tigers, The Magic neTjakastad Junior. SAB League: Tshwane University of Technology neNC Professionals.