‘Ngijabule ngesimo esesiyiso eqenjini’
UMQEQESHI weRichards Bay FC uBrendon Truter, uthi uqina idolo uma eqhathanisa isimo iqembu lakhe eselikusona manje, nesimo alifica likusona ethatha izintambo ngaphambi kokuqala kwesizini ka-2018/2019.
Ngokusho kukaTruter ufike kuleli qembu eliphethwe uSifiso “Jomo” Biyela, abadlali bengekho esimeni esihle ngokomqondo. Uthe obekudala lokho ukuthi ngesizini ephelile bebevika izembe kwiNational First Division (NFD), kanti kumasizini amabili edlule kwadayiswa isitifiketi seThanda Royal Zulu, sathengwa AmaZulu FC.
Ngeledlule, iBay inqobe umdlalo wayo wokuqala ekuhambeni kule sizini, ishaya iMaccabi FC ngo 1-0.
“Sisuka kude naleli qembu. Ngijabule indlela isimo esesiyisona kulokhu engafika kuyikona. Ngifike lapha abadlali bengekho esimeni esihle ngokomqondo, ubona ukuthi kunezimo ezibagqilazile balahlekelwa nayithemba. Ngesizini edlule iqembu belivika izembe, kanti kumasizini amabili edlule iThanda yawina isicoco seNFD kodwa yagcina ngokudayiswa. Konke lokho kwakhe ukuthi ungabi khona umoya wobunye eqenjini,” usho kanje uTruter.
Lo mqeqeshi odabuka eKapa, uthe njengamanje konke kuhamba njengokwezifiso zakhe kwiNatal Rich Boys.
“Kunomoya wobunye, wokusizana nokulekelelana. Sinqobe umdallo wethu wokuqala ekuhambeni ngeledlule. Lokho kususe omkhulu umthwalo emahlombe ethu kwazise bese kunesikhathi sifuna ukunqoba ekuhambeni. Angingabazi ukuthi uma siqhubeka nalo mgqigqo siyobanjwa kude,” kuchaza uTruter. NgoMgqibelo iBay izotholana phezulu nePretoria University FC, e-Absa Tuks Stadium ngo3.30 ntambama. “Sesiyakwazi manje ukuqeda umdlalo singangenelwa yigoli. Lokho kusho lukhulu. Ukukhuluma nje iqiniso asifuni ukushaywa amaTuks ngoMgqibelo ngoba lokho kungasho ukuthi sizoba namaholide angemahle. Sizolwela iphuzu kumnyma kubomvu, kodwa uma kwenzeka sithola ithuba lamaphuzu amathathu sizolisebenzisa. Ngicabanga ukuthi bazoza kuthina bebhodla umlilo njengoba sebeshaywe kabili kulandelana,” kuqhuba uTruter.
Imidlalo yeNFD kule mpelasonto: NgoMgqibelo Mbombela United v Maccabi FC (Kanyamazane Stadium, 3.30pm), Uthongathi FC v Jomo Cosmos (Sugar Ray Xulu Stadium, 3.30pm), Pretoria University FC v RichardsBay FC (Tuks Stadium, 3.30pm), Witbank Spurs v Royal Eagles (Puma Stadium, 3.30pm), TS Sporting v TS Galaxy (Kabokweni Stadium, 3.30pm), Stellenbosch FC v Cape Umoya United (Idas Valley Stadium, 3.30pm). NgeSonto: Ubuntu Cape Town v Real Kings (Athlone Stadium, 3.30pm)
NgoMsombuluko: Tshakuma v Ajaxa Cape Town (Cape Town Stadium, 3.30pm)