Ukhala ngabadlali abalahle amaphuzu
UBALISA ngokuhluleka kwabadlali bakhe ukubamba amaphuzu amathathu esesezandleni umqeqeshi weHighlandsPark, u-Owen Da Gama, onengcindezi yokugcina iqembu likwi-Absa Premiership.
IHighlands ibanjwe yiPolokwane City ngo 2-2 emdlalweni wePremiership ePeter Mokaba Stadium, ePolokwane ngoLwesibili ebusuku.
Amagoli eHighlands Park ashaywe nguMoeketsi Sekola noMothobi Mvala. AwePolokwane ashaywe nguMohammed Anas noWiseman Maluleke. IHighlands idlale ngokulingana okwesikhombisa emidlalweni engu-13 kusukela ibuyile kwiPremiership.
UDa Gama ukholwa wukuthi baphunyulwe amaphuzu obekufanele bagoduke nawo. Unozinti uMarlon Heugh ubatakulile evimba iphenathi ka-Anas sekuzophela umdlalo. “Ukuvimba iphenathi kuwushintshile umphumela kancane. Kodwa ngicabanga ukuthi bekufanele siqede ngabo esiwombeni sokuqala. Sithole inqwaba yamathuba. Kwenzekile sibhekene naMaZulu, sathola inqwaba yamathuba, athola elilodwa alivalela phakathi. Emuva kokushaya igoli lesibili bekufanele siwuphathe kangcono umdlalo kodwa siqhubekile safuna elesithathu nelesine. Lokho kusishiye sivulekile emuva. Besingcono kunabo, iqhinga lethu lisisebenzile. Ekugcineni lena iligi enzima, sisazama ukuzinza kwiPremiership. Baningi abadlali beNational First Division esinabo. Sizoqhubeka nokusebenza kanzima, sizoqhubeka nokufunda. Siyitholile imiphumela emihle. Ngicabanga ukuthi iPolokwane City idlale ngokulingana okokuqala ekhaya. Bekuwumdlalo omuhle. Asikhulumi kakhulu ngonompempe nangokuphathwa kwemidlalo kodwa ngikholwa wukuthi usekhona umsebenzi okufanele wenziwe. Manje kufanele sigxile emdlalweni wethu neCeltic.”
Umqeqeshi wePolokwane, uJosef Vukusic, ulamukele iphuzu wathi iHighlands ibafake ingcindezi. “Besifuna ukuwina umdlalo kodwa esiwombeni sokuqala basimise kabi ngamabhola ahamba phezulu. Udonga lwethu lwasemuva luthwale kanzima. Ngijabule ngokuthi kuleso simo sithole igoli. Elesibili bekungafanele lisingenele. Senze amaphutha amaningi, amanye abekade edalwa wukuthi bayasicindezela. Kodwa amanye abeqhamuka emabholeni alula. Okuhle ukuthi sibuyile. Besinalo ithuba lokuwina ngephenathi kodwa asangayishaya phakathi. Sijabule ngokuthi sithole iphuzu ngoba bayingozi phambili, banomgadli onzima kakhulu.”
Mayelana nokuhluleka ukushaya iphenathi kuka-Anas uthe: “Ngicasukile ngokuthi asiyishayanga phakathi iphenathi ngoba siyasazi isitayela sakhe. Ngimbuzile ngaso wathi uyazethemba ngoba yindlela yakhe awashaya ngayo. Akayena umdlali wokuqala ohlulwe yiphenathi futhi akayena owokugcina. Ushaye igoli elihle kulo mdlalo ngakho ubenalo ilungelo lokuthatha ibhola ashaye iphenathi.”