Ikhonsathi yokusiza abaphase u-matric abaswele imali
IZIHLABANI zomculo kamaskandi eziyinkukhu nempaka, uKhuzani ‘Indlamlenze’ Mpungose noMthandeni ‘Igcokama Elisha’ Manqele zizoke zikhohlwe ukungcofana kodwa zibambe iqhaza ekuqongelelweni kwemali yokusiza abantu abantulayo.
Labo maskanda abasanda kukhipha amaCD abo Inhlinini Yexolo 2 nethi Ubisi bazobe benandisa kwiDr 3 Seconds International Music Festival eMhlathuze Sports Complex, eRichards Bay, ngoMgqibelo kusukela ngoekuseni. Umthandazi waseMevamhlophe eMpangeni futhi owayengumpetha wesibhakela kuleli, uThulani ‘Dr 3 Seconds’ Nkwanyana, uthe inhloso yalo mcimbi akukhona ukugwilikisa abantu kodwa ukuqongelela imali yokusiza abantwana abaphase kahle kodwa abangazi bazothathani bahlanganise nani. Uthe ziningi izingane zasemakhaya ezibhuquza nemiphumela emihle ka-matric ngenxa yokushoda ngemali yokufunda ezikhungweni zemfundo ephakeme.
Uthe kulo mcimbi bazobuye banxenxe uhulumeni ukuba aphonse itshe esivivaneni ekulweni nokukokotelwa komculo. Kulo mcimbi kuzobe kusina kudedelana izingwazi zakuleli oCassper Nyovest, Duncan, Mshoza, Khuzani, Sjava, Mroza Fakude, Mfiliseni Magubane, Qhosha, Buselaphi, Zulu Messengers, Phuzekhemisi, Mkhathazi, Amageza Amahle, Osaziwayo, Mzukulu kaSdwedwe, Thokozani Langa, Ali Mgube nabanye. Uhlelo luzobe luphethwe ngabasakazi boKhozi FM uMdonso, Zimdollar, Kini Shandu, Nomkelemane noTshatha Ngobe. Amathikithi alo mcimbi abiza kusukela kuR100 kuya kuR500.
*Khonamanjalo uKhuzani, Igcokama Elisha, Tshatha, Nomkelemane, Qhosha nabanye bazobe beshiyelna inkundla kwiNyus’iVolume ezinkundleni zemidlalo zaseMelmoth namhlanje. 10