Ucasulwe ukufeyila wazidubula washona
UZIDUBULE ngesibhamu sikayise, izolo umfundi waseMlaza okuthiwa ubephatheke kabi ngenxa yokuthi ufeyilile.
Lo mfundi (16) wentombazane obefunda uGrade11 eGanges Secondary, ngaseMerebank kuthiwa uthole ukuthi ufeyilile ngoLwesithathu.
Umthombo waleli phephandaba osondolene nomndeni, uthe lo mfundi ubehleli noyise kuphela izolo, unina esemsebenzini. Uyise okuthiwa ubesazumekile ngoba ubesebenza ebusuku, kuthiwa uvuswe ukuqhuma kwesibhamu endlini engaphandle.
“Isibhamu besikhiyelwe esisefeni. Sisola ukuthi ingane intshontshe ukhiye waso yakhipha isibhamu uyise engaboni, yasifaka ezingubeni ebiqeda kuziwasha.
Iphume nazo izingubo ngoba ibiziwashela endlini yokugeza, endlini enkulu obekulele kuyo uyise, sengathi iyozineka. Izishiye eduze kukalayini yangena endlini engaphandle, yazidubulela khona yashona. Kuthiwa ishiye incwadi okuyiyona ababone kuyo ukuthi uzibulale ngoba efeyilile kodwa bengingakayiboni,” kusho umthombo.
Uthe lesi senzo sibashaqise kakhulu ngoba le ngane ibingakhombisi ukuthi ingase yenze okubi yize izwile ukuthi ifeyilile ngoba iriphothi layo lilandwe ngoLwesithathu.
UCapt Nqobile Gwala okhulumela amaphoyisa KwaZulu-Natal usiqinisekisile lesi sigameko, wathi intombazane eneminyaka ewu-16 itholakale ishonile kubo inenxeba lokudutshulwa esiphongweni. Amaphoyisa ayaphenya.
UMnuz Muzi Mahlambi woMnyango wezeMfundo eKZN uthe bayazwelana nomndeni kanti ezikoleni banesifundo iLife Orientation, abafundi abafundiswa kuso ngezinto ezithinta impilo.
Uthe kwesinye isikhathi kusuke kunezinye izimo ezenza umfundi azibulale kungesikho ukufeyila kuphela.