Babanjwe oKlebe begwaza abe-ANC
LIBASHONELE abaholi be-ANC baseZululand ngesikhathi bebanjwa oqotsheni oKlebe izolo bezama ukugwazela ikhansela le-DA ngoR20 000.
Laba baholi abathathu asagodliwe amagama abo, kuthiwa babanjwe eVryheid Junction, eWimpy beyogwazela leli khansela ukuze lingayi emhlanganweni wokuchitha uSomlomo we-IFP kaMasipala waseBaqulusini, uMnuz Mkhonyovu Khumalo.
Lokhu bekuzokwenza ukuba isibalo sivune i-ANC bese ikhipha uKhumalo ngevoti emhlanganweni obuyizolo.
Umholi weDA KwaZuluNatal, uMnuz Zwakele Mncwango uthe babikelwe ikhansela labo ngalo mkhonyovu base bebikela oKlebe.
“Baqale bamthembisa uR100 000 kodwa babuye bathi kunoNgqongqoshe ozomqasha emnyangweni othile. Sibize oKlebe sacela ithimba likazwelonke, oKlebe bahlale kusuka ngoLwesithathu. Ikhansela lethu bese silitshelile ukuthi alifune imali ngoba yiyo ebizoba nobufakazi obubambekayo. Nokho ubengeyedwa kulesi simo kodwa kukhona amakhansela amabili okungele-IFP neleEFF nawo abethenjiswe imali. Lawa makhansela awezanga emhlanganweni afake izincwadi zokugula. Ikhansela belitshelwe ukuthi uma selinikwe imali kuzomele liqambe amanga lithi liseGoli,” kusho uMncwango.
Okhulumela oKlebe KwaZulu-Natal, uCaptain Simphiwe Mhlongo uthe abasolwa baboshelwe inkohlakalo bazovela namuhla enkantolo.
Umkhulumeli we-ANC, u-Advocate Nomagugu Simelane Zulu ethintwa uthe bebengakabi nalo ulwazi ngabaholi babo ababoshiwe.