Bakhala bayazithulisa abaqolwe eyesondlo
KUVALWE ngehlahla emindenini emibili yaseKranskop eqolwe imali yesondlo sezintandane engaphezu kukaR29 000 isiyonke.
Kuphela amasu uma ecabanga izindleko zikaKhisimusi uNkk Londiwe Mbatha (56) okukhishwe uR12 000 ekhadini lakhe obuhlangene nemali yengane eyodwa abeseyilinde unyaka emuva kokuyivuselela. UNkk Mbatha uthe watshelwa ngoNovemba 9 ukuthi imali abeyilindele yokuvuselela isibonelelo sengane eyodwa isiphumile uzoyithola ngomholo kaDisemba esekhokhelwa nezinyanga abezilindile.
“Ngaya ngosuku lokuqala lomholo ngoNovemba 28 ngafaka ikhadi langavuma ukukhipha imali emshinini. Ngadlulela ePosini bangibhekela bathola ukuthi ikhadi linoR4 000 ekubeni bengilindele imali elinganiselwa kuR12 000. Ngiyekile ngacabanga ukuthi kukhona esazongena kwathi sengibuyela ngathola ukuthi bekungene uR12 000 nemadlana kwakhishwa uR9 300 kwasala uR2 980,” echaza.
Uthe ePosini bamtshela ukuthi le mali ikhishwe ePort Shepstone kwakhanselwa nekhadi lakhe. Ubeholela izingane ezimbili ngekhadi elisha lasePosini.
Ukhala esifanayo uNksz Thandeka Gasa (49) naye oholela amawele aneminyaka engu-19 abewavuselelela isibonelelo. Ubelindele uR18 000 njengoba imali selokhu yavaleka ngoJanuwari wonyaka odlule.
“Bengihola ngekhadi elisha ePosini, ngaya kohola ngoDisemba 1. Ngathola ukuthi ukhishwe wonke uR18 000 ngavele ngasangana,” kusho yena.
Uthe ubikile emahhovisi akwaSouth African Social Security Agency (Sassa) eKranskop wavula necala emaphoyiseni, okushaye isikhathi sokuloba ingakatholakali imininingwane yalo. UCaptain Nqobile Gwala okhulumela amaphoyisa esifundazweni ukuqinisekisile ukuvulwa kwecala lokukhwabanisa likaNkk Mbatha athe liphenywa eKranskop emuva kokuba kushishwe imali emshinini. UNkk Mbatha noNksz Gasa bathi njengoba kulungiselelwa uKhisimusi abazi nokuthi bazodlani ngoba bebethembe le mali. Okhulumela abakwaSassa esifundazweni, uMnuz Mbizeni Mdlalose, uthe bahlela umhlangano nezikhulu eziphezulu zePosi ukulungisa udaba lokuqolwa kwezimpesheni.
“Nathi sikhathazekile futhi siyethemba ukuthi uphenyo luzophothulwa maduze kujeze lezi zigebengu. Sinxusa abaqoliwe ukuthi babike emahhovisi ethu bavule namacala emaphoyiseni.”