Inkinga ngohlelo ‘olufeyilisa’ abafundi
SEKUQUBUKE izikhalo ngohlelo loMnyango wezeMfundo lokugcina imininingwane yabafundi kuphinde kufakwe namamaki kulona ukuze kwenziwe amaripothi, iSouth African School Administration and Management System (SA-SAMS) okuthiwa lufeyilisa abafundi.
Othisha bakhala ngokuthi lolu hlelo kwesinye isikhathi lwehlisa amamaki abafundi, lukhipha amaripothi anezifundo ezingaphelele, kwesinye isikhathi kuphume amaripothi anezifundo okungezona ebezenziwa ngumfundi.
Omunye wothishanhloko ocele ukungavezwa, uthe luyinkinga lolu hlelo ngoba ngisho abasebenza ngalo abakwazi ukukuchazela uma selukhipha izinto ezingaqondile.
Uthe lunamaphutha amaningi wathi uma unganakile abafundi luyabafeyilisa.
“Luyinkinga ngoba thina sigcwalisa yonke into bese siyihambisa ehhovisi lesifunda ukuze kube yilo elifaka lolu lwazi kwiSA-SAMS. Kubuya inqwaba yamaphutha, umnyango kumele wenze ngenye indlela.”
Omunye umzali oshayele Isolezwe wacela ukungavezwa, uthe ingane yakhe ifeyile uGrade 10 ngoba ifeyile isiZulu ekubeni unyaka wonke ibisiphasa lesi sifundo.
“Ubuye neripothi elithi ufeyilile ngaya esikoleni, uthishomkhulu wangitshela ukuthi akubanga iphutha labo kodwa imiphumela ekhishwe yiSASAMS. Ngicele ukubona iphepha alibhala uthishomkhulu wathi angifake isicelo emnyangweni,” kusho umzali.
UMengameli weNatu, uMnuz Allen Thompson, uthe bayazi ngezinkinga ngalolu hlelo wathi babhalele uNgqongqoshe kazwelonke uNkk Angie Motshekga, befuna alubhekisise ngoba uhlelo olusetshenziswa ngumnyango kazwelonke. Uthe izikole ziyakhala ngamaphutha kulona wathi luqhatha izikole nabazali. “Izikole kumele zizibalele ngoba uma zithembele kulolu hlelo maningi amaphutha. Kumele lubhekisiswe ikakhulu njengoba kunezikhalo ngalo.”
UNobhala weSadtu, uNksz Nomarashiya Caluza, uthe mningi umsebenzi obhekene nothisha ngoba ezikoleni ezingenabo omabhalane kudingeka kube yibona abafaka imininingwane kumakhompyutha.
Ululeke umzali ukuthi atshele isikole ukuthi simtshengise iphepha elibhalwe ngumfundi ngoba unelungelo lokuthi uma engeneme ngemiphumela atshengiswe ukuthi ingane yakhe ibhale kanjani.
Okhulumela umnyango eKZN, uMnuz Sihle Mlotshwa, uthe lolu hlelo lukhipha imiphumela esuke ifakwe othisha.