Imindeni igasele emakhazeni
IMINDENI eshonelwe, izidumbu zezihlobo zazo eziduve emakhazeni aseStanger zithi zizifuna zihlinziwe noma zingahlinziwe.
Le mindeni engu-31 ebisemakhazeni aseStanger izolo ifuna ukunikwa izidumbu zezihlobo zazo ithe seyifuna ukuzingcwaba noma zingahlinziwe izidumbu zezihlobo zayo.
Lokhu kulandela ukungahlinzwa kwezidumbu kulawa makhaza kusuka ngesonto eledlule ngoba abasebenzi bekhala ngokuthi i-air conditioner ayisebenzi egunjini okuhlinzelwa kulo.
UMnuz Sphiwe Khanyile (50) wase-Appelsbosch uthe sekuphele amasonto amabili egqigqa kulawa makhaza ngoba efuna kudedelwe isidumbu sikamfowabo uMnuz Henry Khanyile ozibulele emasontweni amabili adlule. UKhanyile uthe bebezimisele ngokuthi bamfihle ngesonto eledlule kodwa lokhu kwangenzeka.
Kwenzeka lokhu nje abasebenzi basemakhazeni aseFort Napier nakuGale Street basanda kuboshwa ngenxa yokuhudula izinyawo kodwa babuye badedelwa ngoba kuthiwa ababuyele emsebenzini.
UMnuz Sifiso Dlamini ongumgqugquzeli wenyunyana yabasebenzi, iNational Public Service Workers Union (Npswu) uthe abasebenzi bakulawa makhaza abekho esitelekeni kodwa banenkinga ngenxa yokungasebenzi kwe-air conditioner egunjini okuhlinzwa kulona izidumbu. Uthe uMnyango wezeMpilo KwaZuluNatal ubikelwe ngalesi simo. Uqhube wathi okubakhathazayo ukuthi iziphathimandla zomnyango zithathe izinsiza kusebenza nokwenza kube nzima ukuthi abasebenzi basebenze.
Uthintwa ngalolu daba umnyango uthe usalungisa izimpendulo.
Okhulumela uMnyango, uNksz Ncumisa Mafunda, uthe umnyango udlulisa ukuxolisa kuyo yonke imindeni okuphazamiseke izinhlelo zayo zokufihla ngenxa yezinxushunxushu ezidalwe yisiteleka sokuhudula izinyawo kwabasebenzi basemakhazeni. Uthe isiteleka asikho emthethweni futhi benza konke okusemandleni ukubuyisela isimo kwesejwayelekile.
“Ngempela kuphazamisekile ukusebenza emakhazeni aseStanger ngenxa yokufa kwe-air-conditioner egunjini lokuhlinzela izidumbu. Ngesikhathi isalungiswa, umnyango ukhiphe izimoto zokuthutha izidumbu ziyohlinzelwa kwesinye isikhungo.”