Zivulelekile izimoto emabhishi
ZIZONGENA ngaphandle kwamaphemithi izimoto emabhishi aseThekwini nasezindaweni ezigudle ulwandle, nonyaka. Lokhu kuvele izolo esithangamini nabezindaba emuva kokuba iMeya yeTheku uNkk Zandile Gumede ihambele amabhishi ukuqinisekisa ukuthi konke sekumi ngomumo ukwamukela izivakashi.
Ngokujwayelekile uma sekungamaholidi kuvalwa izintuba eziphumela emabhishi, kungene kuphela abanamaphemithi afakelwa izicelo emahhovisi kamasipala.
USuperintendent Sibonelo Mchunu oyiPhini leNhloko yamaPhoyisa kaMasipala, uthe kuzobe kuqala nonyaka ukuthi kungangenwa ngamaphemithi kodwa kunezinhlelo zokugwema isiminyaminya.
UNkk Gumede uthe okuye kudale isiminyaminya yizimoto eziningi ezipaka emabhishi, kulokhu kuzokwenziwa nezinye izindawo zokupaka eziphephile.
Uthe kukhona ngisho amavolontiya azosebenzisana namaphoyisa nonogada bezinkampani ezizimele ukuqinisekisa ukuphepha nokugwema isiminyaminya.
Uthe amaphoyisa azobopha kwasani abaphambana nomthetho.
Kuvele ukuthi kutshalwe amaphoyisa akamasipala angu430 aqeqeshwayo, izolo abekhona eviliyela.
Kuqashwe nonogada abangu-341 abazosebenzisana namaphoyisa, kwandiswa nabahlanza idolobha.
Labo nogada namaphoyisa bazotshalwa ngisho ezinxanxatheleni zezitolo.
UMnuz Sipho Kaunda onguSihlalo wekomiti lezokuvakasha kumasipala, uthe zikhona izinhlelo zabahlala emgwaqweni nabo abajwayele emabhishini ngalezi zinsuku.
Uthe bavele basebenzisana nezinhlangano ezizimele ukubanakekela, babaphe nokudla.
Imikhankaso yokuqinisa ezokuphepha emabhishi yenziwe ngokuhlanganyela noMnyango wezokuThuthukiswa koMnotho nezokuVakasha esifundazweni.
Esitatimendeni esithunyelwe abezindaba, onguNgqongqoshe walo mnyango uMnuz Sihle Zikalala uthe amaholidi afike ngesikhathi esihle iTheku lisanda kunconywa ngokuba namabhishi ahlanzekile. Uthe abeNational Geographic baphinde bahlonza iKwaZulu-Natal njengesifundazwe esidinga ukuvakashelwa.
Izolo bese beqalile abantu ukutheleka emabhishi, sekukhona namatende okugadwa kuwo izingane ezilahlekile nawo anabasebenzi abaqashwe umasipala.
Kuke kwanamahlebezi okuthi abatakuli basemabhishi bahlongoza isiteleka kodwa iMeya ikuchithile lokhu njengoba nabo bebekhona izolo.