Isicelo se-ANC ngoluthinta uZuma
I-ANC icele abantu ukuthi banike uMengameli Cyril Ramaphosa ithuba lokufunda isinqumo senkantolo sokuthi lowo owayengumengameli wezwe, uMnuz Jacob Zuma azikhokhele izindleko zecala lakhe lenkohlakalo nokukhwabanisa.
Izolo iJaji Aubrey Ledwaba lithe isinqumo sokuthi uhulumeni kufanele akhokhele icala likaZuma asikho emthethweni ngakho kufanele azikhokhele izindleko zakhe.
UMnuz Dakota Legoethe ongumkhulumeli we-ANC osabambile uthe bayasamukela isinqumo senkantolo beyi-ANC ngoba bayawuhlonipha umthetho kodwa ucela umphakathi unike uRamaphosa isikhathi sokufunda isinqumo senkantolo ngaphambi kokuthi enze isimemezelo. “Siyawuhlonipha umthetho kodwa sizolinda uMengameli wezwe ne-ANC uMnuz Cyril Ramaphosa ukuba enze isimemezelo. Siyacela nomphakathi umnike ithuba ukuze ezokhipha okuzokwenzeka kusukela manje.”
Uhulumeni usekhokhe uR16.3 million wezindleko zecala likaZuma.
Ummeli kaZuma u-Adv Daniel Mantsha izolo utshele abezindaba ukuthi akazi noma bazosidlulisela phambili lesi sinqumo kodwa uzothinta umuntu ammele ukuze bahlahle indlela eya phambili.
Umholi weDA uMnuz Mmusi Maimane uthe bebazi ukuthi inkantolo izofinyelela kwisinqumo esifanele ngoba akukho semthethweni ukuthi abakhokhi bentela bakhokhele izindleko zecala likaZuma.
Uthe bazoqhubeka nokulwa nenkohlakalo nokuvikela abantu baseNingizimu Afrika ngoba uRamaphosa ne-ANC bayahluleka wukwenza lokho.
Isazi somthetho uSolwazi Pierre de Vos sithe uma ludluliswa lolu daba luzoyiswa eNkantolo yoMthethosisekelo kodwa nalapho kufanele abameli bakhombise ukuthi luwuthinta kanjani uMthethosisekelo noma lubaluleke kanjani emphakathini.