UHlaudi uzoqeda isibonelelo sikahulumeni uma esengumengameli
OWAYEYISIKHULU esibhekelele ukusebenza kwaSABC uMnuz Hlaudi Motsoeneng uthi uzokuqeda nya ukuholwa kwesibonelelo sikahulumeni uma esengumengameli ngoba lokhu kwakha isizwe esivilaphayo.
Izolo uMotsoeneng uthule iqembu lakhe lepolitiki elibizwa nge-African Content Movement (ACM).
Uthe usungule iqembu lepolitiki ngoba ebona ukuthi amaqembu epolitiki akhona awabasizi abantu.
I-ACM inophawu le-Afrika ephethwe ngezandla ezimbili, uMotsoeneng uthe lokhu kusho ukuthi ikusasa lisezandleni zabantu.
“I-ACM izosiza bonke abantu baseNingizimu Afrika. Ngonyaka ozayo ngizoba wumengameli futhi angimesabi uMengameli Cyril Ramaphosa, uyena engincintisana naye ngoba ungumengameli. Ngiyakwazi ukuletha izidingo ngoba ngisho ngikwaSABC imisebenzi yami yayibonakala, ngenza isiqiniseko sokuthi abaculi abashoni behlwempu,” kusho uMotsoeneng.
Uthe uma esebusa kuzophela ukuholwa kwezibonelelo zikahulumeni ikakhulukazi imali yeqolo ngoba lokhu kwenza abantu babe ngamavila.
“Asikho isidingo sokuthi abantu bahole izibonelelo zikahulumeni ikakhulukazi abasha ngoba kwenza babe ngamavila. Uma sengiwumengameli ngizokuqeda lokhu. Abantu ngizobanika umhlaba kodwa ngeke ngiwuphuce abamhlophe ngizoxoxisana nabo ukuthi bawudedela kahle. Anginayo inkinga nabamhlophe njengoba nibabona ukuthi bakhona kulesi sithangami sabezindaba,” kusho uHlaudi.
Uthe uzogqugquzela ukuthi kuze abatshalizimali kodwa kufanele bahambe uma sekuphele iminyaka ewu-30.
“Uma uzokwakha ifemu eNingizimu Afrika ngeke sikudayisele umhlaba sizokurentisa bese kuthi uma usuyakhile ifemu abasebenzi babe namasheya kuyo.
“Silindele ukuthi uhlomise abasebenzi ngamakhono ukuze emuva kweminyaka ewu-30 uhambe. Yonke into ngifuna ikhiqizwe eNingizimu Afrika futhi sithenge impahla eyenziwe kuleli,” kusho uHlaudi.
Uthe ushintsho luzobonakala ngamehlo uma esephethe futhi ngeke abe nonogada, uzobe ehamba ngebhayisikili ngisho eya esitolo ngoba akafuni ukumosha imali.