Umdlalo kamathandana asiwuyeke kuza amabhonasi
MASOLEZWE ngicela ukuqala ngixolise ngokuthi ngiphundulekile nganganikhumbuza ukuthi sekuyisikhathi sokumisa umdlalo kamathandana ngoba sekusondele amabhonasi. Ngokomthetho kufanele ngabe nginikhumbuze ngoNovemba ukuthi sekuyisikhathi sokuthi kuqale izinkinga othandweni ukuze kuthi kushaya isikhathi sebhonasi nokuhlukanisa izitokofela umuntu abesehamba yedwa. Njengoba sesiphakathi noDisemba akuselula ukuthi umuntu aqale isiphithiphithi ngenhloso yokwehlukana nomuntu asethandane naye unyaka wonke emuwashela, emphekela.
OkaVolos uyafisa ukunazisa ukuthi zikhona izabana ongazenza ukuze uvikele imali yakho kumuntu othandana naye ofuna ukuyidla ngezindlela ezahlukene. Indlela elula ongavikela ngayo imali yakho wukuthi ufike ekhaya usudemelayisa uthi umqashi wakho ubalekile washiya enganiholelanga. Uma ungashongo ukuthi imali ibaleke nomqashi kungcono ufike ekhaya usukhala uthi izigebengu zikwephuce ikhadi lasebhange maqede zakhipha yonke imali yebhonasi.
MaSolezwe ngivumeleni nginikhumbuze ukuthi njengoba sekunguDisemba nje akusafanele kuqhutshekwe nomdlalo kamathandana ngoba wonke amahuzu avuke emaqandeni afuna ukudla izimali zabantu. Uma unesesheli esisha amashushu sikushela ngoDisemba kufanele wazi ukuthi uhlangane nendlondlo enophaphe ekhanda efuna ukukwenza isiqeda sikaKhisimusi. Kufanele uzibuze ukuthi uqhamukaphi umuntu onofuqufuqu lokweshela ngesikhathi lapho abantu bebaleka nezimali zamabhonasi.
Bakwethu ngifisa nikhumbule ukuthi lona nguKhisimusi wethu wokuqala sekuvunyelwe ukuthi insangu ibhenywe ngokusemthethweni. Lokhu kusho ukuthi kufanele sikulindele ukuthi abantu bazodakwa ngendlela engafani neminye iminyaka. Labo abaziyo bazongifakazela uma ngithi umuntu odakwe wutshwala uyakhathala aphelelwe ngamandla, ngakolunye uhlangothi umuntu odakwe yinsangu ubanamehlo abomvu aphenduke isipiyoyo esinamadla. Lokhu sekusho ukuthi kufanele sikulindele ukuhlangabezana nezidakwa zensangu ezinamandla ezilwa kuze kuyoshona ilanga.
MaSolezwe ngivumeleni ngiphawule ngombono woMhleli oshicilelwe kuSolezwe langolwesibili lapho abekhala khona ngazinkawu ezihlalise lubhojozi iziguli zaseRK Khan Hospital. OkaVolos ufisa sizibuze umbuzo wokuthi kungani izinkawu zithanda ukuchanasa ezibhedlela kodwa zingatholakali ezindaweni ezifana namajele nasezikoleni. Impendulo ithi izinkawu zithanda ezibhedlela ngenxa yokuthi kunensada yezithelo ezifana nobhana nama-aphula aphathelwa iziguli. Okufanele sikuqonde wukuthi izinkawu zihlakaniphile ziyakwazi ukubona ukuthi kuneqwaba yezithelo ezithuthelwa ezibhedlela ngenhloso yokuthi zidliwe yiziguli. Isikhathi esiningi uthola ukuthi iziguli zigcina zingazidlanga izithelo eziphathelwe zona ngenxa yokuxinwa wukugula. Izinkawu zingena ngenxeba ngoba zibona izithelo zibekwe emawodini kube kunabantu abagulayo abangenamandla ukuzixosha. Kuyiqiniso ukuthi izinkawu zigangile isidalo sazo, yingakho zingagcini ngokudla izithelo uma sezingene emawodini kodwa zijike sezizenza odokotela ngokuthi zidoncule namadrip ezigulini. Isinyathelo sokuqala sokulwisana nezinkawu ezibhedlela wukuthi kumiswe ukuphathela abantu abagulayo izithelo ngoba bagcina bengazidlanga bexinwe wukugula.