Lungisa Meya yeTheku konakele eMlaza
MHLELI: Kwelakho eliwela umfula ugcwele, ngithi ake ngiphefumule nami nakhu sidlala abantu sibhekile bo!
Okokuqala angikuveze ukuthi iqiniso alifuneki, liyababa, yingako nalolu daba kungenzeka lungashicilelwa.
Ngicela ukusho ukuthi siphethwe izehluleki kulesi sifunda sethu, kulo mkhandlu waseThekwini ohlonishwa kangaka. Ngake ngaba nethemba ubaba uWillies Mchunu ethatha isikhudla sokuba uNdunankulu lapho alibeka ngembaba elokuthi uzoqondana ngqo namaDelangokubona. Ngiyabona umama uGumede wamdonsela engxenye wamtshela ngezinhloso zakhe ngamaDelangokubona.
OkamaCingwane manje uthule uthe du, amaDelangokubona ezichanasela nje. Ngesonto eledlule kwa-W eMlaza bakhiphele umuntu izibhamu, bathi bazomdubula akabazi bona. Bayaziwa laba bantu ngoba abaseMlaza iningi labo. Nakhu ngolwesiHlanu sebelimaza amabhokisi amathenda.
Isiphumile esandleni le ndaba yamaDelangokubona. Bhasobha mama Zandile Gumede, sikubhekile. Sengathi ufuna ukwakha ama “mafia” aseNingizimu Afrika. Wake wabonaphi abantu baphule umthetho baziwa kodwa bayekwe bebe bengaqali? Lokho kuyinkomba yokuthi baqhamuka kubaphathi besifunda. UMlaza awusathuthuki ngabo laba bantu.
Lungisa mama Gumede konakele eMlaza! Thina siyawuthanda lo Mlaza wethu, size sithande ngisho eNanda koMawoti lapho uzalwa khona kodwake lokhu osilethele khona akwenzi kahle yingakho singakuthandi.
Kulesi sifunda silwe kakhulu, manje laba bantu banezibhamu ziyabashisa ngoba abakaze balwe. Abayazi impi, bazi ukuthi kuyadutshulwa kuphela. Sesicela angenelele uMacingwane.