Abazali abafake isiko lokufunda ezinganeni zabo, bangayekeleli nje kothisha
D A Nhlangulela MHLELI: Siyacela abazali bezingane zesikole babe neqiniso njengoba sekuzophuma imiphumela yokuphela konyaka. Umuntu uvuna akutshalile. Kunohlobo lwabazali othisha abangafisa ukuhlangana nalo baze bafise nokuthi ingane zabo zingafeyili.
Izingane zabo ziyahlupha esikoleni, azibahloniphi othisha nemithetho yesikole. Uma becelwa ukuthi beze esikoleni kuzoxoxwa ngezingane zabo abayi. Abanye bayeza esikoleni bafike basole othisha noma kube sengathi abazi ukuthi izingane zabo ziyahlupha.
Ezinye ziyaphendula emakubo kodwa umzali enze sengathi akukaze kwenzeka lokho.
Okuthusayo wukuthi umzali ulindele imiphumela emihle kodwa akakaze ayibone ingane yakhe ibhala umsebenzi wasekhaya futhi akakaze ayibone ifunda incwadi ilungiselela izivivinyo.
Abanye bayabizwa ukuze baboniswe umsebenzi wengane phakathi nonyaka kodwa lutho ukufika. Uphele unyaka ingane lutho ukuphumelela, “othisha abafundisi futhi mina bengingazi”. Umfundi ukhuliswa wumzali, uthisha, yisikole nomphakathi. Umzali ubaluleke kakhulu. Sicela babambe iqhaza emfundweni yezingane zabo. Bangagcini ngokukhokha nokuletha ingane esikoleni bese bethi othisha bayobona.
Izingane ezizalwa ngabazali abanemadlana zenza sengathi aziyidingi imfundo. Zinamalungelo amaningi kodwa azikwazi okufanele zikwenze ukuze zijabulele amalungelo azo.
Sicela abazali batshikitshele isiko lokufunda ezinganeni, ingane yazi ukuthi yonke into iyasetshenzelwa Xolani Majola