I-Avante izocula ingaphelelanga
I-AVANTE isiyalele ilungu layo uLinda Gcwensa ukuthi aphumule ukuze kuzoshaya unyaka ozayo seliwumqemane, ukuze bezokwazi ukugijima bephusha i-albhamu entsha.
Lokhu kuvezwe ngelinye ilungu laleli qembu, uLucky Cele, othe uLinda usanda kuhlinzwa esibhedlela.
Sekunesikhathi uLinda agcina ukubonakala njengoba egula.
“Usanda kuhlinzwa ngoba ephethwe yizinso. Sithe akaphumule kancane. Uyalulama yena, asifuni ukuthi aphuthume abuye ngoba simdinga engumqemane uma sesiphusha i-albhamu yethu ekuqaleni konyaka ozayo,” kusho uLucky.
Ugcizelele ukuthi iqembu lisamile aliyi ndawo futhi kulo nyaka bebegubha iminyaka engu26 lasungulwa.
“Zazikhona izingqinamba endleleni ukuze sifike kule minyaka esikuyo manje kodwa ngenxa yothando lwabantu sisakhona. Silokhu silalela umphakathi ukuthi uthini. Kwakunzima ngesikhathi kuhamba abafowethu emhlabeni esasisebenza nabo. Umphakathi kodwa ulokhu usigqugquzela njalo futhi yiwo owathi asithole amalungu amasha sibe bahlanu,” kuchaza uLucky.
Leli qembu libunjwe nguLucky, Linda, James Langa, Sizwe Mtambo noSibonelo Dlamini.
Kubonakale isikhangiso sokuthi lizonandisa ePlayhouse emcimbini iChristmas Celebration Concert ngoDisemba 22 nango-23.Uveze ukuthi i-albhamu yabo izoba nezingoma ezingu-12. Umdidiyeli omkhulu wayo nguProfessor njengoba beyenze enkampanini yakhe iProper Files. Uthe basebenze noMbuso Khoza, Donell Jones, Skhulu Miya, Sipho Mbhele noBabo Ngcobo.