Wenza ezibukwayo oweMbewu elingisa
KULEZI zinsuku wonke umuntu ongumlandeli womdlalo Imbewu, ukhuluma ngethalente elivezwe abalingisi abahlukene ngesonto eledlule ngesikhathi kubhoboka imfihlo ephakathi kukaPhakade noMaZulu.
Lokhu kwenzeke esiqeshini sangoLwesithathu olwedlule kulo mdlalo okhonjiswa ku-e.tv, ngo9:30, ebusuku.
Yize kubonakale amathalente ahlukene futhi kwanconywa abalingisi abaningi abakhombise ikhono labo kulo mdlalo, kodwa elikaFundiswa Zwane olingisa indawo yokaMadonsela kulo mdlalo alisalanga ngaphandle.
Nami ngibheke emuva kwangifikela ukuthi le ntokazi akuqali ukuthi kunconywe ikhono layo njengoba yake yaduma ilingisa indawo kaRethabile kuGenerations.
Ngibe sengicela ukuba nengxoxo nayo, nebizwakala ikhuluma ukuthi ijabule ukuthola ithuba elifana naleli.
Iveze ukuthi ngesikhathi iqeda isikole ePort Shepstone High, yahamba yayofundela ukulingisa e-AFDA, eKapa.
“Ngizalelwe eMtetweni ngakhulela khona, ekhaya ebelifudumele njengoba ngikhule nezingane zasekhaya kumnandi. Esikoleni bengiwumuntu okhonze ezemidlalo kodwa uma kukhona imidlalo yasesiteji eyenziwayo bengingasali ngaphandle. Ukulingisa ngangingakunakile imidlalo iyona into eyayihamba phambili,” kuchaza yena.
Uthe othisha esikoleni babelokhu bemtshela ukuthi noma engenzani kodwa ukulingisa angakuyeki.
“Sengifunda uGrade 11 no 12 kukhona uthisha engingeke ngimkhohlwe owangitshela ukuthi ngingenzi lutho angibheke ukulingisa. Ngafunda ngokuzimisela ngisho sengiphumile esikoleni. Ngiqeda iziqu zami ngaba nenhlanhla njengoba ngangineminyaka engu-23 ngithola indawo kaRethabile kuGenerations. Ngajabula kakhulu njengoba lokhu kwakugqamisa ngokusobala ukuthi impilo yami izoshintsha,” kuchaza yena.
Uthe ukuba semdlalweni owuchungechunge eqala ukubonakala kuthelevishini ikhona okwamkhuthaza ukuthi asebenze kakhulu.
“Yize ngangike ngabonakala emdlalweni iDrivers Down, kodwa ukuba kuGenerations eyayinkulu ngaleso sikhathi kwangenza ngazibona ukuthi ikusasa liqhakazile,” kuchaza yena.
Uveze ukuthi ngemuva kokuphela kwendawo yakhe kulo mdlalo, wagxila emidlalweni yasesiteji nasebhizinisini elithinta yona imidlalo yasesiteji. “Njengoba sengikuMbewu nje, abantu
bekade bangigcina kuthelevishini bengingahlezi, imidlalo yasesiteji eminingi ngiyenzile ngase ngiba inxusa ngaphinde ngadayisa izimonyo zenye inkampani enkulu kuleli,” kuchaza yena.
Uthe ukujoyina kwakhe Imbewu, nokuwumdlalo omusha kuye kwamjabulisa njengoba ethanda ukuba semidlalweni eqalayo neveza okusha kodwa.
“Lo mdlalo abantu basazowuthakasela kakhulu njengoba kukuningi okuzokwenzeka kuwona. Kodwa uma kuziwa kukaMadonsela impilo isazoba nzima njengoba abantu bezobona ukuthi ngabe umshado wakhe usazoqhubeka nokuba khona noma cha? Izingane lezi ezikhona manje ngabe uzozamukela yini? Kuningi okusazoshiya abantu belindele lukhulu,” kuchaza yena.
Uthe kuningi akufundile nokuzosiza abesifazane empilweni yangempela ababhekene nalesi simo.
“Mina angishadile kodwa ngifunde ukuthi uma ungowesifazane ukhetha ukungena emshadweni kumele ukulungele ukuhlale uphoxeka,” kuchaza yena.
Uthe yize esekulomdlalo kodwa amabhizinisi akhe enza kahle kakhulu futhi usaqhubeka nawo.
Uma ezihlalele ekhaya engenzi lutho ujabulela ukuhlala nomndeni wakhe acabange ngemidlalo emincane afuna ukuyibhala ukuze ibonakale kuthelevishini.
Uthe uyathanda futhi ukuchitha isikhathi nendodakazi yakhe uNomaswazi.
Ukupheka uthe ukukhonzile futhi umndeni wakhe usuyazi ukuthi uma kuzopheka yena uzobalungiselela inyama yenkukhu noma ufishi njengoba kuyizinto azikhonzile.