Ozokwethula uhlelo lwabalana bukhoma
LUZOKWETHULWA wumlingisi osengene nasemculweni uhlelo okuzobonakala kulo izithandani zalana bukhoma kwithelevishini.
Uhlelo oluthi Seng’khathele, luzoqala ukukhonjiswa kuMzansi Wethu (DStv Channel 163) kusukela ngoJanuwari 5, ngo-7.30, ebusuku kanti luzobe lwethulwa uLerato Mvelase.
Izithandani ezingasajabule ebudlelwaneni ezikubo yizona ezizobonakala kulolu hlelo.
UTebogo Keebine, wenkampani iTribal Media House eqophe lolu hlelo, uthe uma uhlelo luqala kuzobonakala ocela usizo echaza ukuthi yini emholele ekuthatheni lesi sinqumo.
“Ezinye zezizathu ezigqamile ngesikhathi sikhuluma nezithandani wukuthi zikhathele ukukhohliswa, ukungaziphathi kahle kukaphathina, inkinga yezidakamizwa, izinkinga zemali, ukuhlukumezeka nezinkinga embhedeni,” kusho uTebogo.
Uthe lolu hlelo, oluzokhonjiswa iziqephu ezingu-13, ekugcineni ababonakale kulona bazothola ukwelulekwa ngenxa yezindaba abazobe bezitholile.
“Kuleli sekubonakale izinhlelo eziningi ezikhuluma ngothando kodwa alukho nolulodwa oluveza uthando nezinto eziholela ekupheleni kwalo. Into eyenze saqala lolu hlelo wukuthi sisize abantu abangakwazi ukushiya othandweni abangasafuni ukuhlala kulo,” kusho yena.
UReneilwe Sema, ongumqondisi wezinhlelo kwaMNet, uthe akekho ongazi ukuthi uthando yinto enhle kodwa kwesinye isikhathi luphula inhliziyo.
“Uthando sihlala silubungaza ezinhlelweni esinazo okukhona kuzo i-Our Perfect Wedding neMarry Me Now. Sibone ukuthi asikhombise futhi uma seluphela.
“Kulolu hlelo ngeke kubonakale oyedwa echaza ngesinqumo sakhe kodwa bobabili bazothola ithuba lokukhuluma ngothando lwabo nezinkinga zabo,” kuchaza yena.