Uzosebenzisa amanothi oweChiefs
UZOSEBENZISA amanothi abewathatha bedlala neSuperSport United, umqeqeshi weKaizer Chiefs, u-Ernst Middendorp, obingelele ngewini emdlalweni we-Absa Premiership eMbombela Stadium ngoLwesithathu ebusuku.
IChiefs inqobe ngo 1-0 ngegoli elihle likaGeorge Maluleka alishaye esiwombeni sesibili. Kulo mdlalo ilahle amathuba amaningi ngaphambi kokuthola igoli. UMiddendorp uthe ujabule ngokunqoba yize kusekuningi okumele bakulungise.
Kuzobonakala ke ukuthi kukhona abadlali asebekulungisile kusasa uma sebedlala ne-Elgeco Plus yaseMadagascar eMoses Mabhida Stadium, eThekwini ngo-8.15 ebusuku.
Lona umdlalo womlenze wokuqala womzuliswano wesibili wokuhlungela amaqoqo eCAF Confederation Cup. Uma iChiefs idlulela phambili izobe isihlangana namaqembu azophuma kwiCAF Champions League, abazoqhathwa nawo bese kuphuma ayisishiyagalombili azodlala emaqoqweni.
Amaqembu akuleli adlala kwiChampions League kule mpelasonto yiMamelodi Sundowns ne-Orlando Pirates.
“Ngicabanga ukuthi amaphuzu amathathu asifanele futhi abebalulekile phezu kokuba nesikhathi esincane sokulungiselela umdlalo. Ngicabanga ukuthi sibe nomdlalo omuhle nabadlali bebezimisele,” kusho uMiddendorp kwiSS4 ngemuva komdlalo.
Lo mqeqeshi odabuka eGermany umenyezelwe ngempelasonto edlule ukuzothatha izintambo kuGiovanni Solinas obebamba eyeka, ingahlangani imiphumela ezojabulisa abalandeli beChiefs.
Ngesikhathi kuqhubeka umdlalo uMiddendorp ubelokhu ebonakala eshicilela ebhukwini lakhe, okungenzeka ukuthi kuphele umdlalo seligcwele njengoba nabadlali bakhe bebelokhu bengamhlalisile kahle ngoba begeja amathuba asobala.
“Amaqhinga lawa okumele sisebenze kuwona njengokuthi sisheshe silidedele ibhola uma sihlasela. Kumele sikuqonde ukubaluleka kokugqobhoza udonga nokuthi usidoba kanjani (siphume) esikhaleni isitobha ukuze uvulele uzakwenu intuba. Lezo yizinto ezigcwele lapha ebhukwini lami, esengizozifaka kwi-lap top ukuze sisebenze kuzona,” kuchaza uMiddendorp.
Wenze izinguquko esikimini esiqale umdlalo. Phakathi kwazo ukubophela uMario Booysen noDaniel Cardoso maphakathi emuva.
“Ngifuna ukukucacisa uma kuwukuthi kukhona ukungaqondi, uDaniel Cardoso noMario Booysen baqinile emuva.”
Uthe ubonile ukuthi abadlali bakhe balahlekelwe ukuzethemba ngamanye amaphutha abewabona bewenza uma beziqeqesha kodwa wethemba ukuthi konke kuzolunga uma beqhubeka nokunqoba imidlalo futhi benyuka kwi-log. IChiefs esiqedile ngemidlalo yeligi kulo nyaka ihleli endaweni yesihlanu kwi-log namaphuzu awu-21, ingemuva ngayisithupha kwi-Orlando Pirates esesicongweni. Izovula unyaka neSundowns ngoJanuwari 5 eFNB Stadium ngo-3.30 ntambama. Imidlalo yeCAF kule mpelasonto Confederation Cup, Kusasa: Kaizer Chiefs v Elgeco Plus (8.15pm, Moses Mabhida Stadium). Champions League, Kusasa: Orlando Pirates v African Stars (6pm, Orlando Stadium). NgeSonto: Al-Ahly Benghazi v Mamelodi Sundowns (5pm, Petro Stadium).