Isiyobonana ngoJanuwari ngonyaka ozayo
NAMHLANJE zibuya namajoka kubabhali bengosi yezezimoto seziyoze ziboshelwe futhi ngoJanuwari 10 ngonyaka ozayo.
Ziningi izinto ezehlukene ezenzeke embonini yezezimoto okwethulwe kuyo inqwaba yezimoto ezintsha ezinye zavalalisa.
KwaVolkswagen nje bethule izimoto eziyisikhombisa okubalwa kuzo izintandokazi iPolo nePolo Vivo.
Kusenjalo, kuvalelise nezinye okuyiJetta neBeetle.
Amaveni alokhu eqhubeke njalo nokuba yintandokazi eNingizimu Afrika nakwamanye amazwe. Yingakho kungathusanga ukubona iMercedes-Benz ingena emakethe ngeyayo iveni. Baqale bethula i-XClass base belandelisa ngeyiV6 – iveni elinamandla amakhulu elisemakethe njengamanje.
Abathandi beBMW bahlanyiswe wukufika kwezimoto okubalwa kuzo i-X2, M5, X4 ne-X5 esanda kwethulwa kodwa indaba ebalulekile wukutshala kwabo imali eNingizimu Afrika. Kuyekiwe ukuthi kukhiqizwe iBMW 3 Series embonini yakwaBMW eRosslyn, ePitoli, kunalokho kwakhiqizwa i-X3 entsha.
Sisekuyo indaba ethinta ukukhiqizwa kwezimoto, iFord iqinisekise ukuthi iveni layo elinamandla iRaptor lizokhiqizwa embonini yabo eseSilverton Assembly, ePitoli. Nenjini uqobo yalo makhandakhanda izokwenziwa lapha eStruandape Engine Plant, ePort Elizabeth.
IMahindra itshale uR10 million eDube TradePort Special Economic Zone, eThekwini, lapho ivule khona imboni. Yilapho benza khona amaveni iMahindra Pik Up single nedouble cab.
Isuzu ngoMeyi yethula imoto yayo yokuqala isizimele ingesewpma umunxa wakwaGeneral Motors ehoshe imfe emakethe ekupheleni konyaka odlule.
Imoto eyethuliwe kube yiSUV i mu-X kanti kwase kuba yiveni iD-Max ebikade yayaziwa ngeKB.
Inkampani yamathayi iSumitomo Rubber South Africa (SRSA) ivule isigaba sesibili sokuthuthukiswa kwefemu yayo eMnambithi edle uR970 million.
ISumotomo yakha amathayi adumile okubalwa kuwo iDunlop, Sumitomo neFalken. Isigaba sesibili sizokwakha amathayi amaloli nawamabhasi. Kusukela ngo-2014 kuze kube manje iSumitomo isitshale ngaphezu kukaR2 billion emnothweni wezwe.
Kukho konke lokhu, intengo kaphethroli ibilokhu inyukile ngaphambi kokuthi yehle kule nyanga.