Kuqwashiswa abashayeli ngokuphepha emgwaqweni
UMQONDISI wakwaaMasterDrive, u-Eyegene Herbert, uthe ziningi izinto abashayeli abangazenza ukunciphisa ubungozi uma besebenzisa umgwaqo namaloli adinga ukunakekelwa.
“Okubalulekile ukuthi uqaphele ngaso sonke isikhathi. Bheka amaloli lapho ukhona nesimo abukeka ekuso. Ngaso sonke isikhathi uma ubona iloli elibonakala ngathi alikho sesimeni esihle kumele ushayele ngokukhulu ukucophelela,” kusho uHerbert.
Ukusho lokhu ngemuva kwengozi yakamuva ebiseMpumalanga. Imibiko ikhomba ukuthi iloli belinganakekelwa ngendlela futhi kungenzeka ukuthi yikho okuholele ekutheni libe sengozini.
“Ungashayeli eduze kweloli isikhathi eside. Uma usuka kusho ukuthi wadlula, yenza isiqiniseko sokuthi unesikhala nesikhathi esanele ukwenza lokhu. Ungawuthathi ushansi uma udlula iloli elibonakala ngathi alinakiwe. Gwema ukudlula iloli uma kwehlela ngoba yilapho amabhreki awo engase engasebenzi khona. Landela nanka amathiphu kanjalo nonembeza ukugwema ingozi emgwaqeni. Kungcono ukufika ngemuva kwemizuzu engu-30 lapho oya khona kunokungafiki,” kusho uHerbert.
Uthe kubalulekile futhi ukuthi abashayeli bazi ukuthi izingqinamba abashayeli bamaloli ababhekana nazo zihlukile kunezabo.
“Isisindo nobukhulu beloli kanjalo nemithwalo eyehlukene kusho ukuthi badinga isikhathi ukuhamba, ukuma noma ukunciphisa ijubane.” Uthe nazi izinto abantu okumele bazibheke: - Shiya isikhala esikhulu phakathi kwemoto yakho neloli.
- Uma ubona umshayeli esibukweni esiseceleni seloli, uyakubona naye.
- Ungami phambi kweloli noma esikhaleni esincane phakathi kweloli nenye imoto. Iloli kungalithatha isikhathi esingaphezulu ngo-40% kunemoto encane.
- Uma lina, shiya isikhala esithe xaxa ngoba amanzi atshaza kulo makhulu. Engathatha isikhathi eside futhi ukuma.
- Uma uhamba phambi kweloli, yazisa kusenisakhathi ukuthi uzojika noma gwema ukuvele ujike kungazelele ngoba adinga isikhathi ukuma.