AbakwaFord bazotetemukisa iLadysmith Mambazo
IQEMBU elinomlando iLadysmith Black Mambazo lizobonakala litetemuka ngezimoto zakwaCMH Kempster Ford kuMngeni Road, eThekwini, ngemuva kokuqokwa kwalo njengamanxusa akule nkampani.
Leli qembu lesicathamiya linikezwe amabhasi amaTourneo Custom amabili aqoshwe igama lalo eceleni.
Imenenja yeMambazo, uXolani Majozi, uthe bajabule kakhulu ngalezi zimoto ngoba zizokwenza umsebenzi wabo ube lula.
“Sijabule kakhulu ngalesi sivumelwano esinaso. Sisayine inkontileka yeminyaka emibili ngombandela wokuthi uma besajabule sizoyovuselela,” kusho uMajozi.
Uthe yibo abaya kuleli garaji beyocela ukuthi basebenzisane, ngenhlanhla udaba abalubeka lasukunyelwa phezulu.
“Sekuzoba lula manje ukuthi abalandeli balibone iqembu ngoba izimoto zibhaliwe futhi nabo egaraji abantu bazokwazi ngezimoto zabo,” kuchaza uMajozi.
Uthe yizo lezi zimoto abazoqhuba ngaso isikhungo sabo iLadysmith Black Mambazo Mobile Academy. Kusona bahambela izindawo ezahlukene befundise izingane zesikole nomphakathi ngomculo.
Izindawo asebezihambile yiKwaZulu-Natal, Eastern Cape naseGoli.
“Sekusele ukuthi siye eMpumalanga manje ngoJanuwari ngaphambi komhlaka -23 ngoba iqembu lizoba nomjikelezo wezinyanga ezintathu e-United States of America,” kuqhuba uMajozi.
Lezi zimoto bazinikezwe ngokusemthethweni ngoLwesihlanu lapho befike baculela khona nabasebenzi.
Iziphathimandla zegaraji zithe ziyaziqhenya ngokusebenzisana neLadysmith Black Mambazo.