Owe-Big NUZ uzolingisa eHostela
UZIMISELE ngokuqhubeka nokulingisa umculi wekwaito, uDanger, ozobonakala emdlalweni osematheni kulezi zinsuku, i-eHostela.
UDanger, ozakhele udumo eqenjini lekwaito laseThekwini, iBig NUZ, ubeqopha kulo mdlalo okhonjiswa kuMzansi Magic ngo-8 ebusuku ngeSonto.
Umxhumanisi wabezindaba nabadidiyeli bomdlalo, uNomfundo Zondi, ukuqinisekisile ukuthi uDanger uzoba kulo mdlalo. Uthe uzobe ehamba nabadala ababizwa ngokuthi EzaseMsinga.
UDanger uthe ujabule kakhulu ngokuvela kulo mdlalo.
“Thina siyizinkabi ezindala ezivela eMsinga zizokhuza izintwana uma ziphuma esandleni. Kuyangijabulisa lokhu ngoba njengeciko ngiyathanda ukufaka isandla kunanoma yini enobuciko phakathi. Kube lula futhi nokuqopha ngoba ngifice abantu engibajwayele njengoL’vovo (Nhlamvukayigeji) noPastor Mjosty (2 Litre),” kusho uDanger.
Uqhube wathi uzimisele ngokuwathatha amanye amathuba avelayo kwezokulingisa.
“Ngizozikhetha kodwa izindawo engizozidlala uma ngilingisa. Inzima leyanto, ungayithatha kancane. Ngifuna ukudlala izindawo ezilula okungakhulunywa kakhulu kuzo ngoba lezi zokugqama zifuna abantu abakufundele. Mina angifuni ukuzixaka ngizwe ngibanjwe abantu ukuthi angikwazi kahle,” kusho uDanger.
Uthe izomsiza futhi le ndawo ukuze kuzoqhakamba igama lakhe.
Uveze ukuthi njengoba engena ekulingiseni nje, ngeke kuze kumphazamise emsebenzini wakhe wokuba wumculi.
“Nginengoma entsha engiyiphushayo ethi AmaVersace.
“Ngisapheka futhi umculo nasemculweni njengoba ngihlanganisa i-albhamu ukuze uma ithi i-Universal Music iyayifuna ngibanikeze,” kuchaza uDanger.