Kulamule amaphoyisa ithathana eDUT
KUSIZE amaphoyisa kucishe kusuka uthuli lwezichwe izolo phakathi kwenhlangano yezitshudeni iSasco ne-EFF Student Command (EFFSC) eDurban University of Technology ngesikhathi i-EFFSC iphazamisa isithangami seSasco nabezindaba.
Usihlalo weSasco, uMqondisi Duma, bese kuphele cishe imizuzu eyishumi eqale ukukhuluma ngesikhathi kuqhamuka isigejana se-EFFSC sangena phakathi kwezintatheli sabuza ukuthi ukhulumelani ngesitshudeni esishonile uMlungisi Madonsela obeyilungu le-EFFSC ngoba abamazi.
“Nikhulumelani ngoMlungisi, uyamazi? Yekani le nto eniyenzayo,” kusho esinye sezitshudeni ze-EFFSC sishaya amakhamera simphuca nephepha abefunda kulona.
Kube sekungenelela amaphoyisa ahlukanisa isixuku kwahlakazekwa kanjalo.
UDuma uqhubekile wakhuluma nezintatheli ezitshela ukuthi abanalo udlame bayahlonipha.
Uthe sibi isehlakalo sokubulawa kwesitshudeni ngoba silwela imfundo.
“Siyakhala ngendaba yokuqashwa kwenkampani yonogada ezimele ukuqapha izitshudeni. Sifuna inyuvesi ilungise ibathathe bonke abangakabhalisi ukuze babhalise,” kusho uDuma.
Umengameli womkhandlu owengamele izitshudeni eDUT, uKhanyisani ‘Godlimpi’ Khambule, ugxeke inyuvesi emuva kokushona kukaMadonsela oshonele esibhedlela esizimele eThekwini.
UKhambule uthe basemanzini ngenxa yokwenzeke izolo lapho omunye wonogada obeqashwe yinyuvesi edubule isitshudeni sashona.
“Sifuna ukudlulisa umlayezo kubaphathi baseDUT, kuhulumeni nakwabomthetho wokuthi kusiphethe kabi okusehlele. Akusiphathi kahle ukuthi kudutshulwe ilungu le-EFF lashona ngenxa yesiteleka,” kusho uKhambule.
Izitshudeni ze-EFF zimashe emgwaqweni odlula kulesi sikhungo izolo kanti amaphoyisa abelokhu eqaphe isimo.
UKhambule uthe bavamile ukuteleka enyuvesi futhi kuvamise ukuthi badutshulwe ngezinhlamvu zenjoloba kodwa ngoLwesibili onogada badubule ngezinhlamvu zangempela.
“Onogada balandela imiyalelo abayinikwa abaphathi benyuvesi ukuthi abadubule izitshudeni,” kusho yena.
Emashini bekukhona namalungu emikhandlu ehlukene okubalwa iSadesmo ye-IFP neBLF.
Abengamele izitshudeni enyuvesi yaKwaZulu-Natal ophikweni i-Edgewood, Westville, Howard kanjalo naseMangosuthu University of Technology bakuqinisekisile ukuthi namabhasi ezitshudeni awasebenzi.
Okhulumela i-EFFSC eMUT, uMvuyisi Mavuthulana, uthe inyuvesi izovalwa kuze kufezwe izidingo zezitshudeni.
“Sizobhekana ngendlela eyiyo nalesi senzo saseDUT ngoba uma sikhombisa ukwesaba singaphinda senzeke lesi sehlakalo futhi sizoqhubeka nokuphatha bethanda bengathandi,” kusho uMavuthulana.