Ixolisile iDUT kushona uMadonsela
UMPHATHI wenyuvesi iDurban University of Technology (DUT), uSolwazi Thandwa Mthembu, useveze ukuthi onogada ababili abahlonywe imibuzo ngamaphoyisa ngokufa kwesitshudeni uMlungisi Madonsela waseNgwavuma, bagxile ekugadeni ubugebengu enyuvesi, hhayi imibhikisho.
UMthembu uthe konogada abangu-250 baseDUT, bayisithupha kuphela abaphatha izibhamu.
Uthe laba abaziphathayo basuke begade ubugebengu bansuku zonke njengoba izitshudeni zibanjwa inkunzi ziphucwe amaselula nezinye izinto. Sinyakazise izwe lesi sehlakalo sokubulawa kukaMadonsela ngoLwesibili ntambama odutshulwe washonela esibhedlela esizimele.
Imibiko ithi akazange aluthole usizo ngoba engenayo i-medical aid.
“Sibuhlungu futhi siyaxolisa ngento eyenzeke enyuvesi kuze kuphume isidumbu. Besingazi ukuthi kuzoba nalo mshophi. Onogada babizwe kulandela ukushaywa ngamatshe kwesinye isakhiwo i-Open House. Siyakugxeka ukusetshenziswa kwezinhlamvu, sizophenya bese sithatha izinyathelo ezifanele,” kusho uMthembu. Ukusho lokhu izolo esithangamini sabezindaba eCoastlands Hotel, eMhlanga.
Uthe bawutholile umqulu wezikhalo zezitshudeni ngoMsombuluko, wathi izitshudeni bezikhala ngezinto eziningi okubalwa ukuthi kuxhaswe ngezimali abenza iziqu ze-B Tech, kuvunyelwe izitshudeni zibhalise noma kuthiwa zisalinde izimpendulo, kuvalwe ezinye izindawo izitshudeni ezingeneme ngazo, kuqashwe ngaphakathi onogada nabahlanza izakhiwo.
Esinye sezikhalo ukuthi kuyekwe ukuhlukunyezwa kwabalwela izitshudeni.
“Sibe nomhlangano nomkhandlu wezitshudeni ngoLwesibili emini ngaphambi kwalesi sehlakalo sokufa kwesitshudeni. Zimbili izinto esingavumelenanga nazo nezitshudeni okungukuthi asikwazi ukushintsha imigomo yeNSFAS ngokuxhaswa kwezitshudeni ezenza iB Tech. Asivumelananga ngokuthi kuyekiswe ezinye zezinkampani ezihlalisa izitshudeni.”
Umfowabo kaMadonsela, uSmanga uthe ucela ukuthi banikwe ithuba bewumndeni, wathi akukho abazokusho okwamanje.
Umngani kaMadonsela obenza unyaka wesithathu weBusiness Administration, u-Ayanda Mbatha obesakhala nayizolo, utshele Isolezwe ukuthi ubengumuntu omnene futhi olungile umufi.
Uthe bebecula ngesikhathi kuqhamuka onogada, bathi abahlakazeke. Izitshudeni zijikijele amatshe bezwa sekuqhuma isibhamu kathathu.
“Sibaleke sonke ngabona uMlu elele phansi, ngiye kuyena ngoba ngizitshela ukuthi uqulekile, ngabona igazi. Udutshulwe emhlane kanti ube esephuthunyiswa esibhedlela ngathola ucingo ntambama kuthiwa ushonile.”
Okhulumela amaphoyisa, uColonel Thembeka Mbele, uthe kuphenywa icala lokubulala. IMeya yeTheku, uNkk Zandile Gumede neKhabhinethi yesifundazwe, banxuse ukuthi izitshudeni zehlise umoya. Emhlanganweni weKhabhinethi, ibamba likaNdunankulu uMnuz Sihle Zikalala, lithe sinyakazise isifundazwe lesi sehlakalo.
“Sinxusa abantu besifundazwe ukuthi bathandazele umndeni, izitshudeni nabaphathi bezikhungo. Sizokwakha ithimba longqongqoshe elizohlangana nezitshudeni nabaphathi bamanyuvesi ukuthola isixazululo.”
Ngenxa yalesi sehlakalo, inhlangano emele imikhandlu yezitshudeni emanyuvesi, iSouth African Union of Students, imemezele ukuthi izozivala zonke izikhungo namhlanje kuzwelonke.
UMthembu uthe izoqhubeka nokuvalwa iDUT, wathi bathumele ithimba kwaMadonsela ukuze babone ukuthi bangasiza kuphi.
Ikomiti lemfundo ephakeme ePhalamende lizobiza izinkampani zonogada zizochaza.
NePrivate Security Industry Regulators Authority (Psira) iyasiphenya lesi sehlakalo.