Selithi khumu iPhini likaSomlomo eKZN
LIZOGXILA emsebenzini womphakathi iPhini likaSomlomo weSishayamthetho saKwaZuluNatal okulindeleke ukuthi lithathe umhlalaphansi ngoEphreli.
UMnuz Meshack Radebe uthe njengoba esezothatha umhlalaphansi uzoqhubeka nomsebenzi womphakathi awuqala ngo-2008, ngaphansi kwenhlangano yakhe , iDkt Meshack Radebe Foundation.
URadebe uthe le nhlangano ayethule ngokusemthethweni ngoMsombuluko, ePinetown izogxila ekusizeni umphakathi kanye nokusiza kwezemfundo.
“Omunye umuntu uzozibuza ukuthi kungani ngethula ngokusemthethweni inhlangano esineminyaka eminingi kangaka isebenza, lokhu ngikwenza manje ngoba bengingafuni ukugqama ngalo msebenzi, okubalulekile kimi bekungukuthi kusizakale abantu bakithi abaswele,” kusho yena.
Le nhlangano, uthe seyakhe izindlu ezingu-42 ezindaweni ezehlukene kulesi sifundazwe selokhu yasungulwa.
“Lokhu kukhombisa ngokusobala ukuthi siyabanakekela abantu. Uma usenomsebenzi owunikiwe akumele ubonakale sengathi ufuna ukugqama ngazo zonke izinto kungakho nje bengingathandi ukuthi ngiyethule, kodwa bengiya kosiza umphakathi. Akukho gcobho ekusebenzeni kwayo. Ukusetshenziswa kwezimali kule nhlangano kuhamba kahle, akekho futhi usomabhizinisi oke wanikela kuyo wangaziswa ukuthi imali yekhe yenzeni. Kwesinye isikhathi bengize ngisho ukuthi lowo somabhizinisi waze kanjani ukuthi kulo muzi kudingeka usizo ngoba ngingafuni ukuzigqamisa,” kusho yena.
URadebe wethule le nhlangano ngokuchoma uphaphe izikole nothisha abenze kahle esifundeni iPinetown.
“Senginesikhathi eside ngifaka esivivaneni kwezemfundo, kwesinye isikhathi bengiye ngiyokhuthaza othisha nabafundi, nginikele ngalokho enginamandla akho okuzosiza othisha nabafundi. Ngibone kuyisu elihle ukuthi ngisungule indondo yezifunda okuzoshintshwana ngayo. Le ndodo izohlala esifundeni esenze kahle unyaka owodwa. Inhloso ukukhuthaza abafundi nothisha. Le ndondo ngiyethule kuNgqongqoshe wezeMfundo KwaZulu-Natal, uMnuz Mthandeni Dlungwane obeyingxenye yokwethulwa ngokusemthethweni kwale nhlangano,” kusho yena.
URadebe uthe okwamanje akafuni ukungena agxile ezinhlelweni zakhe azozenza uma esethathe umhlalaphansi kodwa angasho ukuthi usebe usopolitiki iminyaka ewu-41, okuhlanganisa nokusebenzela uhulumeni.