Kuphenduluke imithandazo yabalandela uBushiri
ABALANDELI nabazalwane bebandla loMprofethi oboshelwe ukushushumbisa imali basuleke izinyembezi izolo yena nomkakhe bethola ibheyili.
Bekuyinjabulo yodwa kubazalwane be-Enlightened Christian Gathering (ECG), ngaphandle kweNkantolo yamacala ezimali ePitoli. Bebejabulela ukuthi umholi webandla uMprofethi Shepherd Bushiri (35) nomkakhe uNkk Mary Bushiri (37) bathole ibheyili kaR100 000 umuntu emunye. Bekusha umculo ngaphandle kwenkantolo abanye bebonga amandla omthandazo emuva kokukhululwa kwabo. Abanye babhale ezinkundleni zokuxhumana ukuthi sekuzoke kufike ubuthongo, bakwazi nokubuyela emsebenzini.
UBushiri nomkakhe, abadabuka eMalawi, baboshwe ngoKlebe ngoLwesihlanu oludlule ngezinsolo zokushushumbisa imali engaphezu kukaR15 million. Akuthathanga isikhathi eside ukuvela kwabo enkantolo, icala lahlehliselwa uMeyi 10.
Okhulumela iNPA, uNkk Phindi Mjonondwana, uthe ngokwemibandela yebheyili uBushiri nomkakhe kumele babe seGauteng naseNorth West kuphela.
“Sibone ukuthi akukho okungavimba ukuthi bathole ibheyili ngoba abayona ingozi emphakathini. Batsheliwe ukuthi uma befuna ukuphuma ngaphandle kwalezi zifundazwe ezibaliwe, kumele babhalele uMbuso bachaze. Wonke amaphepha okuhamba abo athathiwe ukuze babike uma befuna ukuhamba,” kusho uNkk Mjonondwana.
UBushiri umelwe nguAdvocate Barry Roux owazakhela udumo ecaleni lika-Oscar Pistorious. Ngonyaka odlule wamangalela abahleli bemashi eyayisola uBushiri ngokuba umphrofethi wamanga.
Okhulumela ibandla, uMnuz Ephraim Nyondo, izolo umemezele kuFacebook etshela abazalwane ukuthi uBushiri usekhululekile. NgoLwesibili uNyondo uthumele isitatimende kubalandeli ebanxusa ukuthi bafike enkantolo ngo-6 ekuseni izolo. Ubanxuse ukuthi baziphathe kahle, bangenzi okuzobaxanisa nomthetho kumoshe necala.
“Niyanxuswa ukuthi niyeke nemikhankaso ezofaka nepolitiki nokunye okuphambene nomthetho wentando yabantu. Asiqhubeke simeseke umprofethi wethu ngendlela enokuthula nesizotha,” kusho uNyondo.
NgoMsombuluko kade kumuncu kubalandeli be-ECG uBushiri nomkakhe bevele okokuqala enkantolo. Abazalwane bebekhihla isililo ngisho abesilisa, bathandazele ngisho imoto yoKlebe, bephethe nezithombe ezinobuso bukaBushiri. NgeSonto abazalwane babuyele okokuqala esontweni emuva kokushona kwabesifazane abathathu kade benyathelana ngoDisemba eTshwane.