Owe-ASC uchitha imibiko yokuthi sebejoyine i-APC
IQEMBU lezombusazwe elimele onogada i-African Security Congress (ASC) lichitha imibiko ethi selingene emshadweni ne-African People’s Convention (APC) eholwa uMnuz Themba Godi njengoba lilungiselela ukhetho.
Ngempelasonto uGodi umemezele ukuthi sebengene emshadweni ne-ASC njengoba kulungiselelwa ukhetho lukazwelonke oluzoba ngoMeyi.
Engxoxweni neSolezwe, uMengameli we-ASC uMnuz Tebogo Motloung uthe akusilo iqiniso ukuthi sebejoyine i-APC njengokubeka kukaGodi.
“Into eyenzekile sihlanganile ne-APC senza isivumelwano sokusebenzinsana sesikhashana njengoba kuza ukhetho.
“Lesi sivumelwano sokusebenzisana besingasho ukuthi sesingene emshadweni ne-APC njengoba kubikiwe kwabezindaba,” kusho uMotloung.
Uthe uGodi abazange bamnike ilungelo lokuthi amemezele kwabezindaba ngezingxoxo zabo.
“Ukuba yonke into ihambe kahle bekuzomele uGodi athi uma ekhuluma, nami ngibe khona eduze kwakhe ngifakaze kulokho akushoyo kodwa lokho akuzange kwenzeke,” kusho uMotloung.
Uthe ngeke besaqhubeka nokuxoxisana ne-APC ngoba izingxoxo seziqale ngebatha.
“Isizathu esidale ukuthi sixoxisane ne-APC ukuthi thina asinayo imali yokuzimela sisodwa okhethweni besidinga iqembu esizosebenzinsana nalo sikwazi ukungena ePhalamende ukuze sizwakalise izwi lalabo esibamele,” kusho uMotloung.
Uthe iPhini likaMengameli wabo uMnuz Mphostoli Mnisi bammisile enhlanganweni ngemuva kokwenza izivumelwano ne-APC ezigcine sezidukisa amalungu abo.