ICity ifuna ukufunda emaphutheni ayo
U-ANDILE “S’guda” Cele oqeqesha iMaritzburg City edlala kwi-ABC Motsepe, ubona kungekho okunye angakusho ngaphandle kokuthi kule sizini baphikwe yinhlanhla yokuphinda abakwenza ngo-2012 beba ngompetha beligi.
UCele, ozakhele udumo esayihlikihla esiswini kwiOrlando Pirates, utshele Isolezwe ukuthi wazi kahle ukuhlala endawenika-11 kwi-log akukuhle kodwa weneme ngendlela abafana bakhe abadlala ngayo.
Uthe ukuba kuya ngebhola abalidlalayo nanokuthi ukube inhlanhla ibingakubona, ngabe kukhulunywa ukuthi iCity ingelinye lamaqembu ajaha iSummerfield Dynamos embangweni wesicoco.
Lo mqeqeshi ukuvumile ukuthi sekunzima ukuphazamisa iDynamos kodwa osekubalulekile kubona ukusonga isizini besendaweni enhle. “Ngokwami sidlale kahle kakhulu kule sizini, inkinga yethu kube wukuphikwa yimiphumela. Selokhu iqalile isizini umdlalo engingathi sidlale kabi kuwo ngoweRainham Sporting esibambane kuwo ngo-1-1. Umdlalo no-Umvoti United ngikholelwa ekutheni kwakumele siwunqobe ngenqwaba yamagoli kodwa sawulahla ekugcineni. Osekubalulekile ukufunda emaphutheni ethu ukuze sisonge isizini sisendaweni enhle,” kubeka uCele.
Uveze ukuthi kunzima kuyena ukulungiselela isizini entsha ngoba amanye amaqembu ahlale ecuthele abadlali bakhe. Uthe uyaphoqeleka ukuthi njalo ekuqaleni kwesizini aqale phansi ukuzilungiselela kwazise iningi labadlali lisuke selikwamanye amaqembu.
“Ngikhuluma nawe nje yinqwaba enunuselwa ngenkece ngamanye amaqembu adlala khona lapha kwiABC Motsepe League nayibamba kwiPremier Soccer League (PSL). Okubuhlungu la maqembu athatha laba badlali ayababulala ngoba abathatha bese eyabafuya, angabadlalisi. Nakuba kunjalo ayikho into esingayenza, ibhola linjalo. Ngeke sivimbe impumelelo yabadlali,” esho kanje.
UCele uthe maduze bazonyusa abadlali abambalwa abasuka kwi-Under 17 yabo. Uthe lokhu bakwenzela ukubajwayeza indlela yakwi-ABC Motsepe League. Uqhube wathi uzishaya isifuba ngokukhiqiza abadlali bezinga eliphezulu abanjengoSiphesihle Ndlovu weMaritzburg United okuthe ngesizini ka-2017/18 wahlabana ngomklomelo wePSL Young Player of the Season noweMidfielder of the Season. Omunye azigqaja ngaye uPhilani Zulu weKaizer Chiefs.
NgoMgqibelo ezikaCele zizodlala ne-Ashley United esendaweni yesibili uma kusukwa emsileni. Umdlalo ungo-3 ntambama, kanti uzodlalelwa eMpumalanga Stadium, eHammarsdale.
UVusi Mthembu osanda kuthenga i-Ashley nosethimbeni labaqeqeshi, uthe nakuba benamasonto amabili bethenge iqembu kodwa lukhona ushintsho aselubona kubafana bakhe. Bashaywe uMvoti ngo-3-1 base badlala ngokulingana neMilford FC esemsileni. Imidlalo ye-ABC Motsepe League: NgoMgqibelo ngo-3 ntambama: KwaDukuza United v Umvoti (Stanger High); Durban FC v Natal United (Sugar Ray Xulu Stadium); Maritzburg v Ashley (Mpumalanga Stadium).