Ugonyuluke echaza ngokumiswa owePolokwane
IPHINI lomqeqeshi kwiPolokwane City, uBernard Molekwa, lizihlangulile ekuphawuleni ngokumiswa komgadli waleli qembu uRodney Ramagalela owagcina ukubonakala enkundleni ekuqaleni kukaJanuwari.
URamagalela uveze ukuthi usenokhwantalala njengoba esephenduke inhlwa eqenjini kodwa isizathu “engasazi”.
Lo mgadli ubebhoboka ngokungadlaliswa kwakhe ohlelweni iMarawa Sports Worldwide, kwiMetro FM, ngoLwesibili ebusuku.
Elandisa ngodaba, igama likaMolekwa oyiphini likaJozef Vukusic, belilokhu livele njalo.
URamagalela wagcina ukubonakala ngoJanuwari 5 bedlala naMaZulu FC ePolokwane.
“Ngemuva komdlalo kwaqhamuka uBernard Molekwa egijima ethi usihlalo (uJohny Mokgaladi) uyangibiza egunjini lokushintshela,” kusho uRamagalela.
Uthe kwasuka impikiswano phakathi kukaVukusic noMokgaladi.
“Umqeqeshi wayethetha ngokuthi ngimoshe isikhathi ngibambezela ibhola ekhoneni (umdlalo) usuyophela. Kwangixaka lokho ngoba kodlule sasithethiselwe ukuthi asikwazanga ukugcina ibhola sagcina ngokwehlulwa. Kwabuye kwathiwa ngiyeke igoli. Kodwa usihlalo wathi ngihleze ngiwashaya amanye. Emuva lwalokho kwathiwa angihambe ngaxakeka ukuthi bengibizelwani,” kusho uRamagalela osesayine inkontileka yesibambiso neHighlands Park.
Uqhube kwathi sebesejimini bebuyekeza okwenzeke emdlalweni njengokujwayelekile, kwaphikiswana. Kwaphinde kwaba wuMolekwa oqhamuka nomyalelo wokuthi usihlalo ubafuna emhlanganweni benokaputeni nomqeqeshi.
“Angiyanga ngoba ngibona ukuthi ngithathwa kancane futhi kwakungesiwona umhlangano weqembu. Siphi isizathu sokuthi izinto esizikhuluma ejimini zidluliselwe kusihlalo,” kubuza uRamagalela.
Ngemuva kwalokho uthe uMolekwa owafika nomyalelo wokuthi kuthiwe akangabe esaziqeqesha neqembu.
Uyaya ejimini kodwa afike abuke ozakwabo. Uveze nokuthi kufanele afike emidlalweni yeqembu yasekhaya wabuye wahlawuliswa u-40% weholo lakhe. Uthe ubengakayitholi incwadi embeka amacala evela kusihlalo. Ubuye waveza ukuthi akakayitholi imali yakhe yokusayina neqembu (iCity) wathi leyo uzoyilwa kuze kube sekugcineni.
UMoleko ethintwa ngalolu daba izolo uthe: “Angikwazi ukuphawula nganoma yini ayishilo. Mhlawumbe ungathinta okhulumela iqembu.”
Inombolo yesikhulumi ishayelwe yaze yaba nesilokozane ingaphendulwa nekaMokgaladi ibithatha imiyalezo kuphela.