‘Kumele siwine kwiSuperSport’
ULINDELE amaphuzu agcwele umqeqeshi weLamontville Golden Arrows, uSteve Komphela, uma sebethuthana neSuperSport United emdlalweni olandelayo we-Absa Premiership.
Abafana Bes’thende abangakahlulwa ngaphansi kukaKomphela othathe izintambo ekupheleni konyaka odlule kuClinton Larsen, bazokwamukela i-United ngeSonto ngo-3.30 ntambama eSugar Ray Xulu, eClermont. Kuyona le nkundla behlule iHighlands Park ngo 2-1 ngempelasonto.
Emidlalweni emine yeligi i-Arrows iqoqe amaphuzu ayisishiyagalombili, inqobe emibili, yadlala kabili ngokulingana. Iyibambe endaweni yesishiyagalolunye kwi-log ngamaphuzu awu24 emidlaweni ewu-19. Amatsatsantsa a Pitori asendaweni yesishiyagalombili ngawu-26.
“Uma uthola amaphuzu awu-10 (njalo) emidlalweni emihlanu lokho kusho ukuthi usembangweni wesicoco. Ayisikhombisa akubeka kwiTop 8. Uma ushaya angaphansi kwesikhombisa kusho ukuthi usengozini. Iqembu seliqoqe ayisishiyagalombili okuyinto enhle. Manje sekusekutheni singakwazi yini ukuthola awu-11 noma ayisishiyagalolunye. Sifuna agcwele okusho ukuthi kumele siwine kwiSuperSport ukuze kuqhubeke ukuzethemba futhi sikwazi ukusondela kulokhu esizibekele khona,” kusho uKomphela.
Uthe yize beyijabulela imiphumela abayitholile kwedlule, okuhlanganisa nokungena kwi-Last 16 yeNedbank Cup kodwa usemkhulu umsebenzi omhlalele.
“Akufanele ukuthathele phezulu kakhulu ukuwina noma futhi ube usushayeka kakhulu ngokwehlulwa. Okusemqoka manje umdlalo olandelayo. Ngijabule ngokuwina ngoba kusho ukuthi sizokwazi ukugcina indawo yethu kwiPSL nokudlala ngaphandle kwengcindezi. Okuhle ngamaqembu esidlala nawo wukuthi ngike ngabhekana nawo phambili (eqeqesha iBloemfontein Celtic). Sidlalile neSuperSport ngiseseBloemfontein okusho ukuthi ngiyakwazi okumele sikwenze, sekusele ngilifake kubadlali lelo lisu.”
Lo mqeqeshi uthe akayanga emakethe ngoJanuwari ngoba ubesafuna ukubheka bonke abadlali abeseqenjini.
“Uyafika nje emzini omusha, awuwazi wonke amagumbi namakhona kwakhona kodwa usufuna ukuthenga ifenisha entsha, kanjani nje? Kwesinye isikhathi singabaqeqeshi sibuye sijahe ukusayinisa abadlali kanti uvele ukhona eqenjini. Yebo zikhona izindawo esingaziqinisa kodwa ngibone kusemqoka ukubheka wonke umdlali okhona eqenjini.
“Singasebenza ngalaba esinabo, akujahehile ukuthi bese singaya emakethe ngaphandleke uma kuwukuthi uzolanda uRonaldo ozosukumisa yonke iClermont le,” kusho uKomphela.