Kuhlaselwe kwabulawa isikhulu sikamasipala
KUDUTSHULWE kwabulawa isikhulu sikamasipala enkabeni yedolobha eMnambithi, izolo ekuseni.
UMnuz Oscar Hlatshwayo, oyiTechnical Director kuMasipala i-Alfred Duma, kuthiwa ubehamba ngemoto yakhe emgwaqweni uFrancis ngesikhathi ehlaselwa ngamadoda amabili abehlome ngezibhamu, avulele ngenhlamvu eqondise kuyena.
Imoto abehamba ngayo kuthiwa ishayise izimoto ezithathu ngemuva kokuthi esedutshuliwe, kulezo zimoto kukhona netekisi.
UNgqongqoshe wezokuBusa ngokuBambisana KwaZulu-Natal, uNkk Nomusa Dube-Ncube, uzwakalise ukushaqeka ngalesi sigameko waphinde wagxeka lokhu kudutshulwa.
Uthe ngokuthola kwabo, uHlatshwayo uhlaselwe ngamadoda amabili ngesikhathi imoto yakhe izama ukweqa irobhothi.
“Sithemba ukuthi amaphoyisa azobabamba abenze lo mkhuba masinyane. Sikhathazekile ngokwanda kwezigameko zokuhlaselwa kwezikhulu zomasipala. Sinxusa amaphoyisa ukuthi asilekelele ngokubopha abenzi bokubi aphinde athole nokuthi kungani kuhlaselwa izikhulu zokamasipala,” kusho uNkk Dube Ncube.
UCol Thembeka Mbele, okhulumela amaphoyisa kulesi sifundazwe, uthe kudutshulwe kwabulawa indoda eneminyaka engu-38 ebihamba ngemoto edolobheni eMnambithi.
“Amaphoyisa aseMnambithi aphenya icala lokubulala, okwamanje bekungakaboshwa muntu,” kusho yena.