Izinhlelo ezinqala okuzogxilwa kuzo
UMENGAMELI wezwe uCyril Ramaphosa usememezele izinhlelo ezinhlanu uhulumeni azogxila kuzona, okuyizinguquko kwezemfundo ukuze kwakheke amakhono, ukulwa nenkohlakalo, ukwakha amathuba emisebenzi, ukukhipha abantu ebubheni nokuqinisa izinhlelo zikahulumeni zokusiza umphakathi.
URamaphosa (okwesishuthekiwe) umemezele lezi zinhlelo izolo ethula inkulumo abeyibhekiswe esizweni ePhalamende eKapa.
URamaphosa uthe lezi zinto zonhlanu yizona abazogxila kuzona kakhulu.
“Kumele sigxile kulezi zinto ngokushesha ukuze sikhiphe abantu ebubheni. Ngokusebenzisana sonke sizokwazi ukukwenza lokhu. Izinguquko ezinqala kwezemfundo ziyadingeka ukuze kwakheke amakhono,” kusho uRamaphosa.
Uthe bazoqinisa ekulweni nenkohlakalo, wabala nomsebenzi owenziwe ukulwa nayo njengoba kukhona nekhomsihini ephenya ngokulawulwa koMbuso yidlanzana.
“Kumele ziphuculwe izimo abantu abahlala ngaphansi kwazo. Kumele sikhulise umnotho ukuze sakhe amathuba emisebenzi,” kusho uRamaphosa.
Ubale nezinguquko ezenzekile ophikweni lwezokushushisa kuleli, emaphoyiseni, kwaSars nakwiSita.
URamaphosa uqale ngamancoko wathi uma i-EFF iwina ukhetho uzoculela uMengameli waleli qembu uMnuz Julius Malema, ingoma kaHugh Masekela ethi, Thuma Mina. UMalema uhlekile ngesikhathi uRamaphosa esho lokhu.
Ubuye wathi nomholi weDA uMnuz Mmusi Maimane uzoba yingxenye yaleli qembu abazobe becula kulo beculela uMalema uma kwenzeka uMalema esebekwa njengomengameli wezwe.
Lo mnyakazo ubonakale kuyimizamo yokuthi ehlise umoya i-EFF njengoba uMalema wayethe uzomphazamisa uma esethula le nkulumo uma engachazi ngendaba yomnikelo kaR500 000 womkhankaso wakhe wokhetho awuthola kwiBosasa. Kodwa i-EFF igcine ingamphazamisanga uRamaphosa ngesikhathi ethula inkulumo abeyibhekise esizweni.
Afike ecula amalungu e-EFF ePhalamende eholwa nguMalema.
Abedlubhe inyufomu ebovu ephethe nomqulu womthetho wePhalamende nomakalabha.
Amanye amalungu e-EFF abegqoke izikibha ezibhalwe ukuthi bafuna umhlaba.
Kuqhume amakhwela sekufika uRamaphosa ephelezelwa owakwakhe.
Ngesikhathi engena ePhalamende noma esebizwa nguSomlomo ukuzokwethula inkulumo, amalungu e-EFF awazange asukume.
URamaphosa uthe abantu balisabele ikhwelo lokuthi bathumeke ukuze kukhule umnotho kusizwe