Zigawuliwe izindleko zeSona
ASEQALILE amalungiselelo ePhalamende enkulumo ebhekiswe esizweni ezothulwa nguMengameli omusha wezwe ozokhethwa ngemuva kokhetho lukazwelonke okulindeleke ukuthi libe ngoMeyi nonyaka.
Njengoba kulo nyaka kuzovotwa, zizoba mbili izinkulumo ezizothulwa ezizobhekiswa esizweni.
Izolo, uMengameli wezwe uMnuz Cyril Ramaphosa, wethule inkulumo yesibili abeyibhekise esizweni ePhalamende eKapa.
USomlomo wePhalamende, uNksz Baleka Mbete, uthe balindele ukuthi le nkulumo yesibili ibe ngoJuni kulo nyaka.
Uthe kulo nyaka balindele ukuthi sibe ngaphansi kukaR1.9 million wesabelo sezimali ngale nkulumo kaMengameli.
Uthe kule nkulumo abazange bameme kakhulu ngoba izinkulumo zizoba mbili kulo nyaka.
“Asizange sibameme abantu abangomakadebona abaqhamuka ezifundazweni, izingane zesikole nabanye abantu ngoba sifuna ukwehlisa izindleko. Asizange silungise sifake izimbali senze kube kuhle kakhulu ngaphandle kwasePhalamende njengoba sihlale senza,” kusho uNksz Mbete.
Uthe enkulumeni yangoJuni bazomema ngoba kuzobe kuqala ihlandla likahulumeni lesithupha.
Ihlandla lesihlanu ngaphansi kukaRamaphosa lizophela ngaphambi kokhetho njengoba kuzohlakazwa nePhalamende lakuleli.
UNksz Mbete uthe inkulumo kaMengameli ibalulekile ngoba usuke etshela isizwe ukuthi kumele silindeleni kulowo nyaka.
Uthe usuke eneka zonke izinhlelo zezinto ezizokwenziwa nguhulumeni kulowo nyaka wathi nguyena uMengameli osuke ebhalele iPhalamende efuna ukuzokwethulwa le nkulumo.
USihlalo woMkhandlu weziFundazwe, uNksz Thandi Modise, uthe uma kwethulwa le nkulumo kusuke kuhlangane izindlu ezimbili: iPhalamende nendlu yomkhandlu wezifundazwe.
Uthe zehlile izindleko zale nkulumo njengoba lingasekho idina ebelibakhona ngemuva kwale nkulumo. Uqhube wathi nesimo somnotho asivumi ukuthi kungaba namadina abantu behlupheka.