Selumenyezelwe usuku lokuvota

KUPHELILE ukuqagela ngosuku lokhetho lukazwelonke kuleli njengoba uMengameli Cyril Ramaphosa ememezele ukuthi luzoba ngomhla ka-8 Meyi.

URamaphosa umemezele lokhu izolo ethula inkulumo abeyibhekise esizweni ePhalamende eKapa.

Uthe maduze kuzoyiwa okhethweni okwesithupha selokhu kwabusa intando yabantu.

“Leli yithuba lokuthi abantu basebenzise ilungelo labo elalwelwa kanzima elizonquma ukuthi izwe lizobhekaphi.

“Ngixoxile ne-Independent Electoral Commission nondunankulu bazo zonke izifundazwe ngokuthi usuku lokhetho malube ngoMeyi 8,” kusho uRamaphosa.

Unxuse abangakabhaliseli ukuvota ukuthi mabaphume bayobhalisa. Sizovalwa isikhathi sokuthi babhalise uma selufakwe emqulwini usuku lokhetho.

Lubhekwe ngabomvu usuku lokhetho njengoba kunezinto eziningi ezenzekayo ezweni.

I-ANC ifuna ukubuyisa ukwethenjwa nokuwina ngamalengiso njengoba ngo-2014 yathola u-62%, iDA yathola u-22% kwathi i-EFF yathola u-6%.