Ingqephu ibidla umunyu eKapa
BAFIKE beswenke beconsa abamaqembu ahlukene epolitiki, osomabhizinisi nezicukuthwane emikhakheni eyahlukene emcimbini wokwethamela inkulumo kaMengameli Cyril Ramaphosa izolo, eKapa.
UNkk Phumzile van Damme weDA ubegqoke ingubo esagolide ehambisana neduku kanti uthe ingubo yakhe yenziwe umsiki wengqephu wakuleli. Ubefake nezicathulo zeLoubatin athi wazithengelwa umyeni wakhe. Ubehamba nodadewabo omncane.
Umphathi wenyuvesi yaseKapa, uSolwazi Kgethi Phakeng, ufike egqoke ingubo enemibala ehlukene, enemikhono emide namacici amade. Uthe ingubo yakhe uyithungelwe umsiki wengqephu osemncane uRefentshe waseAttredgeville.
UMrs Africa Globe 2019, uNkk Lucia Ochan ubegqoke ingubo ende, eluhlaza satshani, ewu-lace, enendwangu e-cream ngaphansi. Uthe ingubo yakhe uyithungelwe abakwa-N.Q Boutique eMpumalanga.
UMvikeli woMphakathi wakuleli, u-Advocate Busisiwe Mkhwebane ubeswenke ngengubo esagolide, enemikhono emifishane, eveza amabele kancane, ihlotshiswe ngezimbali. Uthungelwe abasiki bengqephu beMashego Designs. Uthe sekuneminyaka emithathu egqoke izimpahla ezithungwa iMashego Designs.
Umholi weCope uMnuz Mosiuoa Lekota ubefake isudi empunga, efake nothayi onemibala kugqame o-maroon.
Umholi weDA, uMnuz Mmusi Maimane ubefake isudi e-navy nothayi ocishe ufane nesudi neshethi elimhlophe.
IPhini likaNgqongqoshe wezokuXhumana uNksz Pinky Kekana, ubegqoke ingubo eluhlaza ende, enomsila sengathi okafishi, ehlotshiswe ngokusaboya obuphephezelayo. Uthe okumenze wagqoka lengubo ukuthi inombala oluhlaza we-ANC futhi ufuna ukugqugquzela abalimi abamnyama ukuba batshale.
Abe-EFF njengenjwayelo bebegqoke ama-overall abomvu namabharethi.